El batafiêr da l'Andreuce nol spegle pui el so neri te Roe di Bernart che lu lenzeve a misdì. Al reste di lui il rivuart te memorie dai anziàns. Cui lu vèvial metût-sù? Al jere stât el vecjo Checo Vattolo (muart tal 1886), pari di Pauli. Al jere vignût di Mulinis e fermât cul fradi a Tombe di Buje. Di lì, bessôl, al jere passât in Ontegnan, po al jere finît in Andreuce. Al veve comprât un dirit de aghe dai Barnabas, che lu vevin rigjtât dai Barachins come dote di une femine jentrade in cjase lôr. Un dirit di aghe cun tun salt di doi metros. Tal 1845 il vecjo Checo al veve metude-sù une fàrie dulà che prime 'e jere une sèe e di chel fari 'e reste une concessiòn dal governo muc. Al fo però el vecjo Pauli a dâj pui fuarce, parceche al ingrandì el mai ch'al vignive mot da l'aghe ch'e 'zirave une ruvede a pàles clamade rût. El mai al jere unevore grant e impuartant par chei timps e al smaraveave la int. Al veve un mani lunc quatri metros e al jere alt otante centimetros: in len, ma cul cjâf di fiêr a forme di musìc di mus, tant che al jere descrit propit cussì: a testa d'asino! Sot, un incuìn di fiêr fermât su di un toc di len, ben plantât insot te tiere. El mai si alzave apene quarante centimetros, ma al meteve une fuarce e un bot che si lu sintive dulintôr di buinore fin di sere. No vevin oraris in chê volte! Ogni minût dusinte colps.

El lavôr al jere dut pai contadins: pàles, forcjes, riscjêi, uàrzines... El fuc de fusine, lì dentri, nol veve ventilatôr: l'àjar ch'al mandave el rivòc da l'aghe dal salt, al vignive cjapât tai tubos e al rivave a soflâ fin sul fuc. El lavôr dal mai al durà a lunç: dal 1845 al 1927. Timps di semplicitât e di lavôr seren. Tal 1927 i fîs di Pauli a' smontàrin el mai, chel mai ch'al

veve vût alc di favolôs par un paîs come Buje. Lu vendèrin e al finì a Cjaurêt (Caporetto), dulà ch'e jerin plantâz atris parinc'; e, po, cuissà indulà... Te campagne lajù in Andreuce 'e reste vadì le memorie dai colps di chel imprest ch'al sveave i croz vie pai fossâi... La fàrie, dulà che Pauli al platà tal 1917 doi ufiziâi, butâz-jù cul paracadute par spiâ i mucs,

'e scomparì par dâ puest a une grande fusine dulà che l'industrie si specializà in forcjes e cumò in tondìns di fiêr, Pauli al murì tal 1940. Al reste ancjmò un fî: Rico, di novantetrè agns, po une stirie di nevôz. El ramàz dai Vattolo di Tombe al lavore ancjmò cul fiêr e al tendûr un atri mai "a testa d'asino", ch'al è però manco vecjo; un mai che si pò ancjmò viodi par capî

cemût ch'al jere el mai di nono Pauli. Di frute j' lavi dispès cun gno pari a viodi el mai e j' restavi incocalide e spauride, e... pui lontane ch'j podevi di chel mostro, che mi pareve ch'al capìs le vôs dal so paron. E mi semeave vîf, posto che si moveve dibessôl!

(inedit dal 1972 circa)