Àlis muartis

Chel de Bastarde j veve dite che cumò si voltave pagjne... che cumò si veve di jessi duc' compagns. Propit cussì 'a jere: jar la cjase di Gjldo, jar l'altri chê di so fradi, prime ancjmò chês de Lungje, dute une rie di cjasis, cun curtìi e tantis napis ch'a vevin par secui soflât-fûr il fum des pòaris cenis. E cumò j tocjave a lui. Duc' compagns... ma lui al veve alc di plui che j pesave dentri.

Ta chê sorte di cusso, lajù, al jere jevât a buinore che l'àjar di jugn al jere zà cjalt e al preparave an'altre zornade senze respîr, un àjar rôs e strac che ancje a pensâ si faseve fature.

Tun cjantòn de plazze, fermis duris grandis, lis machignis a' spietavin i omps. Ogni dì « chei » omps a' rivavin suturnos, a' metevin-su un pâr di ocjai ch'a parevin mascaris, e ancje un pâr di manezzis. Dopo, lôr e lis machignis a' jerin dut-un, come cuarp e anime. A' fasevin sudiziòn a di chei quatri che ognidì a' levin a cjalâ il lavôr, a costo di mangjâ polvar e di restâ sturnîs par un piez. Ma tant! Aromai tal paîs nol jere nuje ce-fâ, anzit no si veve cûr di fâ nie... e po, al pareve di scugnî... come lâ a tignî-su rosari par un muart. Par oris a' stevin cui vôi fis su lis machignis... vôi che no pandevin ni dûl ni pore, pierdûs, sepidiu, tal nuje, musis colôr tiere.

No si visàvino di altris machignis? Lis machignis de vuere? Ancje chês a' fasevin tremâ la strade e i mûrs e il rumôr al leve fin tal cîl. Ma cumò a' copavin lis cjasis, no i omps.

La int lis veve cjapadis in odio lis cjasis, parceche ur vevin olût masse ben, masse a' vevin patît par lôr. Jù, jù! Dutis! Duc' compagns: pòars e siôrs. Si volte pagjne! Lis machignis a' levin indenant planc planc, come in prupissiòn, po si fermavin denant de cjase. Vuè j tocjave 'e sô cjase!

Cumò si alzave alt un braz di fiêr e al veve lassù come un grant pugn neri: la bale si nizzulave un moment prime di molâsi-jù a colp su la cjase. E la cjase 'a steve lì cu lis sôs feridis, scaturide, come lis musis de int, ch'a cjalavin senze pandi un pinsîr. Ma se invezzit la cjase 'a ves pandût il so segret? Eco, la bale a colp 'a sfracajave i cops. Sot, i dinc' di fiêr, la grande bocje spalancade... la pacare 'a jere pronte a gloti fiêr clas len. 'A mastiave, 'a rugnive, po 'a spudave dut sun tun camion simpri pront. Un altri colp e cumò lis tindinis dal balcon a' parevin quant che si va-vie cul treno, che si salude cul fazzolet.

Mandi! Mandi!

La cjase 'a murive e i vôi de int no pandevin dûl.

—  Si volte pagjne! — al tornà a dî chel de Bastarde.

Ma s'a fossin sul serio vignudis-fûr lis pagjnis dulà che par agn lui al veve scrit dut ce che no si po dî a dinissun? Dut ce che si sa de int, dut ce ch'a platin... di cui ch'al jere veramentri fì chel tâl. cimût ch'al veve fat i bêz chel altri?!... Lui nol pezzotave cu la int, ma al saveve dut di ognidun, di ce pît ch'a levin zuès, ce cûr ch'a vevin... Ma distes lôr, là, riverîs, là, come niente fosse! E lui, par tant di manco, la int lu vevin cjapât in asse.

Si volte pagjne! A'ndi veve voltadis tantis lui, di pagjnis, di sere, quant ch'al restave dibessôl... un gust a contâsi la veretât... Po, quant ch'al veve justade la cjase, ti veve sierât dut dentri, tun mûr. Chel mûr.

La bale (nancje ch'a ves savût... ) 'a spietà un moment prime di petâ jù il so pugn grant... E lì a' jerin lis cjartis; lì al jere dut il paîs: chel che no si viôt, come tune lastre negative, prime di lavâle tai àcis. La int, un bundì ca, un regalùt là, une messc. e la fotografie 'a saltave£ûr biele nete clare.

I omps a' tasevin, e in chel 'a passave une femine cun tun fagòt sot un braz:

—  Ah, no vai pes cjasis, jo! Jo j vai nome pai muars! — 'a disè, squasit cun rabie.

Ma lui al steve cun dute l'anime tai vôi, par viodi, cuisà, di podê riscatâ, fûr des maseriis, il so segret. La cjase 'a murive un pôc a la volte e lui al sudave, ancje s'al jere lì fêr, senze movi un dêt, senze nancje bati voli. Ma j pareve di movi i braz come s'al podès dâ lui l'ande a chês machignis; j pareve di fâ ancje a lui duc' i mòtos des machignis, e si stracave senze fâ nie e al jere aromai oris ch'al steve alì; e un pôc a la volte, tal sdrumâ des robis, j pareve che ancje lis passions vecjs a' lessin in polvar. Si voltave pagine! Nissun al varès plui podût jessi chel di prime. E alore? Ancjmò plui j pareve di scugnî cjatâ la fate di tirâ-fûr chel segrèt, di distruzilu...

— Tìriti indaûr! — j berghelà Gusto, e in chel ch'a si finive di sdrumâ l'ultin bocòn di cjase, il polvar si spandeve a larc, a larc, e nol jere plui zâl e rôs, ma neri cumò, che no si viodeve di chì a lì. Tal polvaròn j semeà di viodi a svoletâ sfuèis blancs, come àlis muartis, subit scjafojadis dai rudinàs e dai madòns.

I dinc' rabiôs de pacare 'a muardevin rugnant, 'a mastiavin, 'a mastiavin, po 'a spudavin sul camion e vie dut tal Tiliment, tun àjar cjalt ch'al nasave di polvar e di burlàz. Lis passions dal paîs si studavin tal caligo di chel vincjesîs di jugn.