1955 - N°4

L' Avôt

E alore s'inacuarzè dome quant ch'al fó tal miez.

Parceche 'e jere stade cussì....

Cjalât il smaltìn de svearine tal lusôr di un fulminant, al jevà e al cjatà la nêf sul puiûl. Il frêt al tajave lis orelis parceche la Cereole no jere lontane.

Paschine, la femine, sveade ancje jê, j disè: « No sta lâ! ». Ma al jere dibant.

Sot, tal curtîl, il cjâr cjariât al spietave dut imbombasât di blanc e altris voris i stavin tal cjâf. Paschine si jevà di malevoe e, cence peraulis, si butà intôr un petul sù e un jù. Une sbilfute di femine, dute flât, ch'e gjavave la peraule di bocje a duc' vie pal dì; ma jevade cussì a straoris, 'e taseve, biel ch'a scjaldave un bevarùm neri pal so omp.

Bastiàn, sigurât che di nêf and'jere pôc plui di une quarte, al sclarì la stale cul ferâl che j pincjulave de man.

I nemâi, usâz ch'al jere agn, si jevàrin-su zoculant sui cogui dal salizo. Ur pojà su la cope il jôf, ur impirà tai cuars i cjaviestris e, metût su di sè un garbatul e une passizze di lane, cul stombli al segnà une crôs su la nêf. Po' vie in tal masegn de gnot.

Al jere il so mistîr chel di fâ il cjaradôr.

So pari requie, travanât di miserie, al veve vût zùf e zàf a vivi

e no j veve fat imparâ altri, ma lui al jere content, ché al veve vût fi di frùt voe di sgòrie tal sanc.

Tai momenz di pause, al juda-ve la femine a sgropolâ chei doi cjampuz che j davin la polente.

Sul cjarpint il lusorùt al butave un'aghe zale su la nêf.

Bastiàn al cjaminà a ret dai bûs e, dopo un pôc, i siei voi a' ualmârin la strade ancje tal scûr.

Passade la Taronde la strade no veve plui ingredèis. Al induvinà la crosere dai Abìs e al alzà un pôc il cjapièl, chè lì al jere un Crist di lamarìn inruzinît di timp.

I bûs a' lavin indenant simpri cun chel bót. Dôs bielis bèstiis, cence picagnis, massime il Temul che te vôre al puartave vie simpri la vencade e al cjalave cui siei voi penz. Il Biso al jere bon, ma un pôc maturli.

Bastiàn ur voleve un ben di cûr e ur fevelave di cristiàn.

La strade 'e jere lungje. No un strît tal zòndar cence rivòc, dome qualchi batude fofe di orloi di cuisà dulà e un scûr ingrumât tôr lis robis.

Miôr d'istât, quan' che la lune 'e ten sveâz, e qualchi paveòn si bute tal lusôr dal ferâl e ogni classùt de strade al à une lungje ombrene. Te plagne al è dut un cisicâ e un cjantâ di rusignûi. Tes

vilis simpri un tassel di balcòn inluminât di vegle.

Alore Bastiàn al cjalave lis stelis, cence pinsîrs pui granc' di lui, content di sei bessôl par no baratâ peraulis, che di cjacaris lu sacjave la femine e po', la int, ancje s'e jè dongje, no ten companie.

Ta che gnot, nuie.

Nè vôs, nè lusôrs. Nancje il cjâr nol vuicave. La nêf 'e jere miôr di sonze vecje e dal svuirz.

La Ledre j businà sot, a colp, come la buere. Qualchi borc indurmidît tal scûr, po', plui scure, la schene dal cuèl dal Fum.

Lis oris j puartàrin un spî di clâr e la nêf 'e cjapà alc come di lune. Sandenêl al restà a man zampe e di lassù j colà dolz un sun di Messeprime. Cumò la zornade si viarzeve strache e smaraveade e un cîl nulizzât al pesave sun dut. Sul mont al jere un blanc di plume, sdrups e zondars taponâz e la strade consumade.

I bûs a' tignivin dûr e intôr dal musìc al fumave il flât. I lens a' slargjavin i forcjàz cuintri il nulât, pôi e vencjârs a' sgriavin il cîl.

Dute la vite leade cun pastòriis di frêt.

Po' si viarzè une largjure e, lajù a dret, il paîs.

Traviars chê nêf vualive si doveve rivâ in t'un moment; timp indaûr, in chel pont, la strade j someave plui lungje e plui a

madràc. La nêf 'e gambìe l'infìcje dal mont.

Ce bièl lâ indenant a planc; ma al jere distrani a viodi che i pôi e i lens a' fasevin un grant cercli intôr...

E alore s'inacuarzè a colp... Un tùf tal cûr e il rispîr si zoncjà tal cuèl. Po', come che si fâs cul cjàn ch'al duâr, al sliserì e indulcì i siei movimenz, al sbríssà-jù dal cjâr ben planchìn, al slungjà il pas e al rivà une vôre lontàn dai nemai. Voltât a cessecûl, jù insità a vignì indenant. Ce bèstiis umanis! Tèmul e Biso a' cjaminavin come simpri, ma il cercli dai pôi al pareve che si slargjàs di plui. Par maludiziòn.

— Signôr, j farai dì une messe.... —

IL cûr j bateve a mat e l'inclìs si slargjave denant dai vôi.

— Signôr, j puartarài cjandelis a Madone di Mont... —

Ce biei ch'e jerin il Tèmul e il Biso! Signôr... Signôr!... Signôr!

Po', dopo miezòre o un secul, al rivà dongje i pôi e po' il cjâr al jentrà jenfri lis glovis dai lens.

Alore, Bastiàn si butà in zenoglòn trimant par dutis lis cumissuris, cun tune muse blancje, come resurît da une pôre tremende.