Robis di qualchi timp indaûr, va ben; ma distès ancje par in chê volte a' jerin fûr dal ordenari e dal just.

Sefin de Secje ogni sabide di sere al scugnive puartâj a so pari la buste de pae, ben siarade, sen-ze nancje il segno di un pìzzul tentatîf par viàrzile: nancje par bagnâ la pivide cun tune gazose, d'istât, dopo une lungje zornade di fadie e di sòfogo.

Al veve provât. Urlos, di fâ scjampâ parfin la gjate rosse incolazzade sot la taule!

Sefin al jere aromai sul ôr de paziènzie e dal rispiet par so pari. E une sere al tornave propit cun tune di chês bustis, te sachete dentri de camisole. E lu ferme la vuàrdie: « Frutat, ti mancje il lusôr daûr de biciclete ».

«'Orcoboe! E' àn cûr di vêmal puartât vie, o ch'o lu ài piardût pastrade. A buinore lu vevi ».

« Mi displâs, ma, aromai, al è... tant e tant di multe di pajâ».

Sefin al cîr tes sachetis e nol cjate nancje la crôs di un centesin. Ce vèvial di fâ? Viarzi la buste?

Nancje pensâj, che chê 'e jere come l'ostie consacra-de: di no podêle tocjâ...

Cussì j dîs 'e vuàrdie: « Viodêt mo, no ài nan-cje un centèsin te sachete, e no puès viarzi la buste de pae, ch'al sarès come fâ nassi un cjadaldiàul in cjase. Podêso spietâ fin doman? ».

«Cjale mo, frutat: se tu pàis daurman, al è un cont; ma se invezzit tu spietis la cjarte, al è une vore di plui».

«Come ch'o us ài dit, no puès pajâ. Notàit». fintant ch'al diseve cussì si cjariave di rabie come une suste, e la vuàrdie 'e segnave non e cognon sun tun sfuei.

« E in rivuart 'e paternitât», j domandà, «îsal "di" o "fu" Antonio? ».