Tune joibe dopomisdì, propit tal gno borgut di une volte, 'e jere rivade une companie di comedeanz: une clape di talianoz pùars pezzotôs, che Diu! Ma il borc, che di pezzoz al jere sioron, nol veve fat nissun câs par chel. Pusitive, invezzit, 'e jere la biele nuvitât e la consolazion di savê che chei foresc' gjubiâi e plens di brilo si jerin indegnâz di sielzi un borgut cussì dismenteât fra boscs e ròis, par fermâsi. Al jere come inacuàrzisi cun plasê di no séi i ultins dal dut: i bandonâz...

A' vevin zirât il ciulâ des rovedis fin ta l'ombrene de beòrcje, po a' vevin fermât i carozzons e distacât i cjavai: doi cjavai cul corean ruspi incolât a quatri vuès infûr e cun tant aviliment di vivi, in chel cjâf a pendolon, ch'al someave ch'a cirissin la buse par butâsi a polsâ. Cjavai cussì, tal gno borc, a' podevin séi dome chei de Crete che, di quant in quant, a' restavin tes jechis. Cussì ancje lôr. Bèstiis cunsumadis dal frujo di cuissà cetant timp. Ju vevin metûz te lòbie di Toni Brusìn ch'al sotetave dute la crafarìe... par amôr di Diu. I carozzons a' vevin di séi stâz piturâz te lôr zoventût, ma aromai nissun rivave a cjatâ il colôr natîf.

Parsore 'e pipave, a sbufs pegris e svojâz, une napute rusine, smorseade e cul cjapielut pleât par daûr.

Dut il borc fûr a viodi la maravèe.

Par une scjalute, come da un « Cuâr de Bondanze» a' jerin dismontâz feminis, fruz e umign ch'al pareve dal impussibil ch'a vessin podût stâ duc' là dentri. Tal miez ancje 'ne zovine bionde ch'e pandeve di séi gruesse e ancje za indenant. Femine di un di lôr. Cuissà po di quâl?

I umign a' vevin domandât: « Dove xela la mejo ostaria» e si jerin butâz a bevi là de Bròtule, e a talianâ a quatri o cinc contadins che ju cjalavin cun tant di rispiet, e la bocje spalancade.

Lis feminis a' vevin distirât sui tamons dut un aventari di sbrèndui e un cjagnuzzat bastart, usât a dutis lis pòis, si tombolave su la jarbe, in voltarolis da ridi, cui fruz de companie.

Mai la plazzute no jere stade cussì vive.

La sere stesse, comedeanz e paisans a' jerin, aromai, amions.

Lis contadinis ur puartavin fasûi e patatis pal gust des confidenzis de biele bionde cussì adegnèvul.

Te sabide, sul mûr dal Pec, al comparì un tabelon cun tun Crist di fâ spezie. Come un tamês!

Dut a gotis e spìssui di sanc...

L'artist al jere un dal carozzon, e cun chel Eceomo cuviart di tant rôs, al veve olût fâsi capî une vore ben su lis intenzions de companie.

Teatro al deventà il sotpuarti dai Preantonis, siarât su la strade cul puarton di len e, pardentri, cun dôi coveltôrs scussâz e tasselâz come i parons. Di là, un scjalâr al faseve di pale, e il scûr dal cîl al displeave dut un fonz auâl, cu lis stelis in alt.

Di sere, i contadins a' rivavin in borez a cjapâ lis bancjs dal sotpuarti: une felicitât gnove ch'e costave dome un carantan, e doi centesimins ai fruz.

E finalmentri i coveltôrs a' scomenzàrin a strissinâsi sul fildifiâr tirât e a ingrumâsi di ca e di là; e al pareve che duc' i vôi a' judassin chê fadie...

E sul fonz scûr si presentà un pùar Crist insieme 'e sô cjare Mari. La Madone 'e jere propit la biele bionde cussì complene sot il manto turchin.

Pocjs peràulis pietosis e dulinciosis fra lôr doi, po i coveltôrs a' tornàrin a platâ dut.

Dopo un moment, al comparì il secont quadri.

Il stes Crist, incoronât di spinis e te man une lungje panoglete di palût, denant di un Pilato ch'al berghelave sentènziis e si lavave lis mans tune bazzinele clucade.

Po, simpri plui indenant, Crist sot la crôs, e un gjudeo, cun fâ di bulazzo, che lu bateve a mostro, cun tune mazze di paùgne.

Alore il popul nol rivà plui a stratignîsi, e si jevâ dut un vosarîli: « Lazzaron,... sassìn,... figure-porche!».

Il gjudeo, scossât di chês peraulis, al voltà a colp la sô muse tal clâr lami dal lampion e Ane di Piti, ch'e stave a cjalâ come incjantade, 'e petà un sigo: « Ah, Jesus jo! Ve' là gno fi Milio ch'al fâs di gjudeo, chel birbant ch'al è un! ».

Dute la pietât dal sotpuarti si smolà in tune ridade: «Milio... Milio! ».

Chel al lassà zùs e vergons e cun tun salt abàs dal scjalâr al scomparì tal scûr dal curtîl.

Dôs, tre, seris daurman, simpri chei quadris pietôs, e la int simpri plui seneose di viòdiju.

E ogni volte Gjude, sot il so len disditât, al siarave la Passion cu lis stessis peraulis: «Maledeto l'interesse! ».

E une sere, intant che tal sotpuarti i stes contadins, cul odôr fuart di stale, a' spietavin, cul cûr in man, i tormenz dal Signorin, jenfri i coveltôrs al saltà-fûr un de companie.

Al someave ancje lui avilît di ce ch'al jere suzzedût.