Falìvis

1

La siore 'e veve dât ordin di cuèi lis balotis, La Gjeme 'e saveve che par fâlis deventâ gustosis, al è ben meti dentri une fuèe di orâr. Ma cuissà se la parone 'e custumave cussì. Miôr domandâle: « Signora, anche l'orario? ».

2

La Meneute dal lavri 'e jere lade a servî te famèe di siôr Bepi Marculin.

'E vignive di une cjase tant puare ch'a vevin, dibot, dome il jet sui cavalez.

A buinore, la siore j dîs: «Meneute, va su a fâ la mê cjamare, e puarte fûr il vâs dal sgabel».

Jê 'e va sù, 'e met a puest dut, po 'e cîr di ca e di là ma no cjate nuje.

Alore 'e torne ju a domandâ: «Siore, 'o ài cirût pardut, ma no cjati l'urinâl».

«Cemût!» j dîs la parone. «Ven sù cun me ch'o t'al mostri».

Meneute, alore, 'e reste come imberlide: «Oh, siore, jo no crodevi ch'e metès chê robe sporcje in chel biel armarut!».

«Dulà lu metêso a cjase vuestre?».

«Sot il jet, po, siore parone... ».

3

Rine de Còcule 'e jere lade a mulin e no veve mai molât i vôi de tramuèe e de muele, ma distès, dopo masanât, j mancjavin siet chilos di farine, daûr di ce ch'e veve stazât a cjase. «Diu, Gjovanin, va ben robâ un pôc, ma siet chilos al è masse!» j dîs al mulinâr.

E lui «Stupide, tu podevis fâ di mancul di pesâle, cussì tu sparagnavis une rabie».

4

«Dio mio, pari, ce fin che nus vês tajât il formadi! Par traviars si viôt Vignesie... ».

«Ringraziàit il Signôr che us à dade une buine viste».

M. F.