Gusc' a' son gusc'

In chê sere a' vevin a cene un siôr in grant, e i fruz pìzzui no vevin il lôr puest in taule. La Màlie infati — la mari — 'e veve pensât di mètijur il plat dome ai plui granduz, e ur veve tant racomandât di stâ bòins, di doprâ ben il piron e il curtìs e di netâsi la bocje dome cul tavajuz.

A' jerin robis, chês lì, che jê ur insegnave dopomai; ma 'e jere la viele ch'e ruvinave dut e che ur diseve, quant che la Màlie 'e mancjave: « Uê che no je uestre mari, mangjàit come che us còmude ».

In chê sere, paraltri, i fruz si jerin compuartâz fin a che pont propit ben. Ma a Silvio no j plaseve la jarberave.

Chel siôr, sentât dongje, al veve capît che al frut no j nasave chel plat, e par dâj coragjo al scomenzâ a dîj: «Mangia, piccino; sentirai che buona roba».