Il telefono al sunave ch'al jere un piez, e siore Anute, stant disore, 'e clamà la frutate par ch'e làs di corse a rispuindi. Ma chê j dîs: « Siore, no puès, parceche 'o ài il flât ch'al sa di ài! ».

Speranze j domande a Luzio de coriere: «Dulà vàdie ogni dì cun chê sporte sot il braz la Taresie de Minighine? ».

« Tâs » dissal lui « jê no ûl fâlu savê. 'E dismonte di furvìe te Mussàrie, po 'e fâs il so zirut pai paîs. 'E va a campions di farine! ».

Done Nene no faseve di màncul di rusinâ cuintri pre Domeni ch'al puartave fûr de cjanive la miôr butìlie di vin quant ch'al rivave siôr Agnul, e il vin plui scart par duc' chei altris. J diseve: «Lui, pre Domeni, nol fâs lis robis justis. Al trate masse ben siôr Agnul ch'al à fat di dut... ancje monede false... ».

E pre Domeni: « Beâz i svelz in chest mont... ! ».

La ultime letare dal so omp j veve dât un grant fastili, e Vigje Brèndul si sidiave a pensâ 'e maniere di contentâlu. Cemût vèvie di fâj rivâ fin a Milan dulà che lui al lavorave un imprest tant pesant e tant scòmut di puartâ?