Bisugne cognossi Remigjo Sclavut e viòdilu in cjase sô, cun chei vôi spalancâz, simpri a cirî lavôrs; e bisugne viòdilu a distrigâju, svelt come une gjespe, senze strassâ timp e dandonâsi.

Serio e di pocjs peraulis. L'inzen no j mancje, ma, si capìs, par dadis voris al scuen ancje lui clamâ un mistirant.

Cussì une dì al clamà Toni dal Mìngul a sblancjâj la cjamare; che s'al fos stât nome pe cusine si sarès rangjât dibessôl.

Toni al praparà il blanc, e po benplanchin al scomenzà a pinelâ sul mûr; e intant al compagnave la man cussì dolze cun tune cjante ch'e pareve strissinade a pueste par fâj compagnament: «La don naè mob bile qual piu mal ven to... ».

Remigjo al cjalave e al ripeteve il cjant a cidin, dentri di sè: «La don naè mob bile... ».

Ma al pareve che alc nol làs ben. Lis pineladis dal blanc a' lavin su e ju cun tune pachèe di fâ vignî la vrae.

A un dât moment, dopo vê masanât tal so cjâf une sorte di rasonament sul rapuart fra cjant e sblancjadure, al cjapà in man lui il pinel di Toni, e dopo vêlu tocjât tal colôr, al scomenzà a passâlu sul mûr cun dute viamenze, cjantant a plene bocje: «I bersaglieri portano le piume sul cappello avan-ti il colonnello... ». «Chest al è il cjant che ti covente a tì!», dissàl a Toni ch'al jere restât irnbabinît.