Lusignutis legris

1

Di quant che Massimo, pezzotâr, la veve cjolte, a pôc timp dopo, nol jere un confront. 'E jere deventade un toc di femine, grasse come une tae, che no semeave plui chê che lui al veve menât in glesie: apene trentesiet chilos, rive e no rive, platâz sot di une cotolone di sîs telos rics.

Dopo, a tù par tu, lui ju veve viodûz duc' chei chilos, e, pardabon, j vevin parût masse pôs.

Si visave simpri di chel gambiament e al diseve, ridint, tai cjantons de bocje: «'O ài scugnût jo fâle deventâ tarondine..., e dut a spesis mês! ».

E une dì, intant ch'al scjamave in plazze plaz e scugjelis e al pojave partiare benplanchin chê marcanzìe crevavadizze, al jere rivât un borghesan a vendi feraze e pezzoz, nol oleve piardi timp a pesâju. «Faséit a voli, Massimo... ».

Massimo j veve dit di nò. «Jo 'o vuei pesâ la robe» dissal. «Une volte sole 'o ài fat un afâr a voli: quant ch'o ài cjolt la femine; e 'o ai fat mâl, che s'o la vès cjolte a pês 'o sarês stât plui in casse! ».

2

Prime di lâ in uere a meretâsi la medae d'aur e po montâ tant in alt, siôr Arigo al veve cjapât ancje qualchi semplize incàriche in Cumune; cussì tal qutuàrdis — une

anade nere di fan e di buliduris pulìtichis — al butave-ju lis listis dai disocupâz.

Il so ufizi al jere simpri plen di puare int avilide, ch'e spietave cun brame une strùssie qualunque par podê com-prâ blave.

In prime file — ch'al jevave a straoris par séi il prin a segnâsi su la liste — al jere simpri Remigjo, l'omp di Catine la Sclavute. Al stave lì impins dûr dûr e fêr, denant di duc', sec come une renghe, che squasit si piardeve tai bregons strenzûz 'tôr la vite, e un voli cisbo, umbrît cu l'ale di un cjapielat metût a svuèu.

Siôr Arigo, rivant, al sintive un grant dûl par chê puare int, e 'e jere propit une furtune par lui chê di cjatâ chel biât omp a segnâsi par prin. J domandave: « Ce âtu non? ».

« Guerra Remigjo, detto "Cûl" ».

A siôr Arigo, alore, si smolave, dentri, il grop de ma-lincunie e i lavris j trimavin pal sfuarz di tignî indaûr la ridade. Al faseve fente di no vê capît e al tornave a domandj: « Ce âtu dit? ».

«Guerra Remigjo, detto "Cûl" ».

E la code di chel non 'e ribateve fin di là, tal ufizi dal Sìndic.

3

Il fogolâr impiât, par sòlit, al crèe i amîs, al ten adun chei che amîs a' son za, al invie lis cunfidenzis plui ristivis e duris di saltâ-fûr, al disgrope ràdigos antîcs, al disglazze la supiàrbie di ciarte int, al viarz i tacuins e... al scjalde i cûrs. Insume, al è il grant benefatôr de umanitât!

Ma quant che ta l'ostarie de Linde a' rivavin Meni Viu

e Vito Scugjelin, il fogolâr al piardeve ogni virtût, ancje se parsore al ardeve il plui biel zoc di San Scjèfin.

Cjatâsi insieme e ticâsi, sentâsi dongje e pontâsi cun peraulis garbis, cjalâsi e dâsi botonadis al jere dut un, par chei doi.

I amîs, alore, a' tasevin pal gust di scoltâ e, a gnogno vie, a' butavin ancje lôr qualchi peraulute par scjaldâ di plui il mont.

Muridôrs ducjdoi: Meni come impresari parvìe des palanchis, Vito, invezzit, come capo, plen di stime pe sô cjazze e pe sô martieline.

Une dì si jerin criticâz come il solit e Vito al veve lassât la ostarie prime di duc', ma si jere fermât difûr a misurâ cul so pas, in sù e in jù, il marcjepît.

Meni lu cjatà ancjmò lì ch'al talpinave, fevelant di bessôl e smenant i braz a larc e i dêz « a ragjo ».

« E alore, Vito, ce fastu alì ? » j domandà.

«'O cjali chest marcjepît. Lu âtu fat tu? ».

« Sì. E cun chest? ».

« Brao, pa l'òstrighe! Al è propit ben fat. 'E je la Ùniche robe che no ti è colade... ».

4

I studiâz a' dìsin che a sbarâ il canon, quant che in cîl i nulaz s'ingrùmin a ribalton un plui gnarvôs di chel altri, si salve la campagne di tanc' malans.

Un an parsore dal Tiliment si jere ingropât un nembo dai rârs, jevât sù propit de Foronate ch'e je la fusine dai roganz; e si moveve indenant a spaventâ i paîs.

A Glemone, sul cjscjel, al jere pront il canon par sbarâ

cuintri chei nûi e rivâ adore cussì di sfantâ il perìcul ch'e colas propit chê gruesse: une speranze gnove pal sudôr dai puars sotans.

Dongje i canons a' stavin pronz i sbaradôrs, e, quant che la robe 'e deventà serie: punf! un colp ch'al scjassà duc' i glemonàs.

Ma il secont colp nol rivà nè subite nè mai. E nò parvìe che si fos rote la suste dal canon o parvìe ch'al mancjàs il pòlvar o l'azzarin: al jere suzzedût che la cane dal canon si jere jemplade di tampieste gruesse come ûs di colombe!