Nol jere stât «rastrelament» in paîs in chê dì come timp indaûr quant ch'a vevin intropât duc' i umign su la plazzute di Mels e dut atôr grìntis duris di mucs e il vuacâ dai cjans tignûz pal golâr, dai graduâz: cjans ch'a jerin stâz come diàui scjadenâz a nasâ cjâr di cristian tai sucriz e pai toglâz. Po chel «raush», comandât cun roganze dai todescs, ch'al veve ribatût par mês tes orelis de biade int!

In chê dì, invezzit, al jere stât «rastrelament» in campagne, comandât dai cosacs par svindicâsi dai partigjans. A tradiment a vevin rivât adore a tirâ dongje dome chei cinc contadins, sudâz di fadie, ch'a lavoravin senze suspiet e no s'insumiavin nancje di ce ch'al jere in bolidure, pleâz come ch'a jerin a seâ rèmis, a solzâ cui pîs discolz te tiare fofe. Cumò, un cjaput di discjamesâz e di scunîz ch'a cjalavin lis robis senze capî alc e si lassavin sburtâ traviars i trois e lis cjarandis di ogni dì, e po menâ-su traviars altre campagne, fûr di paîs. E atôr di lôr no jerin i mucs, che vadì a' varessin fat mancul pore, ma soldâz, tant foresc', cu la muse salvàdie che no imprometeve nuje di bon.

Lis feminis a' vevin sigât, po si jerin impitridis tal lôr dolôr a compagnâ dome cui vôi i omps che si piardevin tal vert, che nol jere stât ce scherzâ cuintri lis armis alzadis. Tai cjamps a' jerin restâz i solzedôrs e lis bèstiis fermis tacadis tai prudêi e ch'a scomenzavin a rumiâ dentri dai mosolârs di fildifiâr.

Varisto Binât al lave indenat come insiminît par chel ch'al jere capitât in chei momenz, ma al veve ancjmò un flât di fuarze tun fîl di vôs. Dissâl a Elio Cjargnel che j talpinave dongje: - 'O sin tanche vigjei quant che ju mènin a copâ, ma chei amanco e' àn coragjo di resisti e di tirâsi indaûr cun dute fuarze ancje se la cuarde ur ruvine la piel, e nô invezzit 'o ubidin e 'o tasìn.

Pastrade, Sabino Petros al pensave 'e sô femine e ai fruz restâz spaurîz e dibessôi, e passant pe campagne nol cjalave plui i fens e i sorcs, come ch'al jere a fâ, par confrontâju, tal pinsîr, cui fens e cui sorcs dai siei cjamps ben lavorâz e coltâz.

Setìmio Volp al cjaminave dut inzussît, cui vôi spalancâz a cjalâ dome dentri di sè, un « via crucis » di seugnî patî fin insomp.

Po 'a jerin rivâz su la culine di Buje e a' vevin dât une lampade 'e torate dal lôr paîs che si disegnave aromai come foreste, tal soreli ch'al lave-ju, e po a' jerin stâz siarâz-dentri tune stànzie de scuele.

Lôr si jerin butâz, ce chi ce là, tai cjantons, senze nancje la fuarze di cjalâsi in muse: tant, nissun nol veve plui un frègul di anime par sustignîsi e tant màncul par dâ un pôc di coragjo a di chei altris.

Chel sturniment ur durà un biel pôc, po cui che nol è muart, si sa, al torne a drezzâ il cjâf par cjalâsi atôr.

Difûr la uàrdie cosache, fuarte di mitra e di ghigne, 'e lave sù e jù denant dal balcon, e ogni tant 'e dave dentri cun tune calumade suspietose e nere ch'e faseve vignî ogni pêl un pan.

Sabino al scomenzà a trabascjâ sot vôs, come par fâj cuintri a chel aviliment che lu cjapave simpri di plui: - Biele int 'o sin cumò, pardabon: riscjelâz come la jarbe tal prât. Ma s'o rivarìn a tornâ di chest imbroi, di riscjelis, in cjase mê, no volarai vê nancje l'infìcje, e guai cui che m'es varà inliment!

Un ridi lami al comparì su la bocje dal Volp e, dopo, Leon Pèvar si jevà-sù parceche il gnarvôs no lu lassave cujet e al scomenzà a smanezzâ cul braz gjestri come ch'al jere il so mût di fâ, slungjant un dêt cuintri cui ch'al veve di scoltâlu.

Varisto Binât, pontât a colp di un brut pinsîr, j cjapà il dêt paràjar: - Pal amôr di Diu, Leon, fermàit di menâ chel dêt se no chel là - dissàl cjalant il cosac ch'al misurave il pàs là di fûr - al pò scrupulâ ch'o véis un revòlvar pontât cuintri di lui, e alore 'o saressin dal gjat tanc' ch'o sin!

Leon si fermà malapajât e al molà-ju il braz, restant come incocealît tal miez de stànzie, cul cerneli sblancjât come i siei cjavei: « Ce mont, ce mont - al pensà - e ce sope par un puar vecjo che nol à mai fat mâl a di une moscje».