Tal prin nissun nol jere d'idee di compraju.

No tasin mai — dissal 'Sef. — A' sbitiin saldo pardut — dissè Nenute. Ma po' dopo, faz i conz, Miute 'e rivà adore di tiraju de sô. Par mantigniju di picinins al è avonde un strop di lidric e mieze palote di farine.

Cussì a' jerin rivâz, tôr misdi, sierâz tune seste, sul cjâr di Rico Buscar ch'al faseve il naulisin.

A viodiju cussì nanulins, cul pêl mujart ch'al butave a zâl, al jere un gust, e duc' chêi di famèe, ce in scrufuiut, ce impins, atôr a gjoldiju cui voi, a cjapaju in man, a viarzijur il becut.

Ju ingosàrin di pistum, di verdure e po' vie tal cjôt su la fuèe ch'e scrizzave. No davin masse dafà. Un piulâ che nol rivave tal miez dal curtîl in prin, po la vôs si sglonfà e ben planc qualchi plume blancje si butà fûr a cuviarzi il zâl. A' cjaminavin scudulant, becuzzant ca e là.

Miute s'impensà di puartaju su la beorcje de plazze e di lassâ Perinùt a tigniju a menz par qualchi ore. A' tornàrin cu la gôse sglonfe, ch'al jere da ridi a viodile cussi sburtade in fûr e dute di une bande, e Perinùt ch'al mostrave un gurli ch'al veve tajuzzât intant ch'al viodeve di lôr. Cussì ogni zornade di biel timp. Dopo i ôes a lavin dibessôi fin sul cjanton de plázze a sfiliâ chê jarbute che nissun talpinave. Miute ju tignive di voli dal balcon de cusine, simpri in olme e simpri pronte a fâ petèz. E cussì la pôre di jê, ju veglave vie pal dì. A' passavin cjârs e caretis, e i ôcs a' jevavin dome il cjâf, a' cjalavin in sbighèt cence pôre e po' a' tornavin a passonâ. Si ingruessivin dì par dì, a' deventavin azardôs e dopo passonât a' vevin cûr di lâ atôr a sbitiâ sui marcjepîz e sui pedrâz a dispiet di qualchi siorute çhe ju veve in asse e che faseve lavri. Ma nissun olsave dî alc a fuart. A' bruntulavin di sot vie e a lassavin fâ. Cun Miute al jere miôr no impazzasi, che Diu nus deliberi. Di cunfidenze in cunfidenze, a' passavin dut il dì in plazze; a' polsavin ta l'ombrene lungje dal tôr, si spulinavin cun impen fra plume e plume, a' lavin ca e là cun ande plene di dignitât. 'E sunave la cjampane di misdì e lôr la compagnavin zigant come serenis. 'E bateve une, dôs, tre... e lôr daûr a vosâ bot par bot.

Cussì dut il paîs al cognosseve i ôcs di Miute, e la vôs 'e misurave il timp tan'che l'orloi.

Il piês al capitave sot sere, quant che la int 'e lave a puartâ il lat te latarie dongje de beorcje. Deventâz prepotenz e fuarz di un derìt quistât cun tantis oris di talpinament, i ôcs no lassavin passâ nissun lì a ret. 'E corevin daûr des frutis cjamadis di ga-melis incolmis; lis fasevin scjampâ a gjambis spergotant il lat, a' tiravin pes cotulis lis feminis, jur zigavin daûr, cul bec indenant e spalancât di fâ pôre. Miute no si macolave l'anime par chel. J tornave cont che i ôcs no restàssin a sbitiâ in cjase e ch'a tornàssin plens e passûz,