Partenzis

J displaseve tant, a Bepo fornâr, che Pànfilo, il fi de parone, al fos tornât a partî pa l'Americhe; e si jere metût d'acordo cun Tin dal mulin par compagnâlu cul caretin fin 'e stazion di Glemone.

E si sa, magari cussì nò!, che un displasê al fâs mâl al cûr; e che si scuen scombàtilu cun alc.

In chel câs, la miôr midisine 'e jere dome une tazze di vin, e Bepo lu saveve ben, par vêlu provât plui di une volte; e Tin ancje.

Partît il treno e il fantat, lôr a' tornàrin indaûr passant par ogni ostarie come lis âs par ogni rose. E il prin efiet al jere stât chel di indurmidîsi sul caretin. E a' vevin un cjaval cussì uman ch'al capive la circostànzie, e al saveve ancje fâ la strade dibessôl.

Ma ancje a lui, dopo un pôc,  j jere vignude sêt. No di vin, ben s'intint. Cjamine che ti cjamine, il cjaval cul so caretin e cun chei doi indurmidîz parsore, al rivà fin lì dal Rai, e chê agute frescje, squasit a fîl di strade, j fasè tante gole ch'al smontà dentri, tiransi daûr dut il rest. Cjoh! Il dran dran

dal viaz al jude a durmî, ma s'al mancje, il cidin stès des rovedis al à cûr di sveâ.