Lassade indaûr l'asfaltade, passât un puarton a pinacui di piere, lassâz de bande i biei arcs blancs di une glesie di un paîs legri, la strade 'e torne disdevore, strente e inglereade e 'e monte ben planc su pe mont.

La valade largje tal dopomisdi 'e respire une fumatizze clare e lizêre che scuint il flum ma no rîve a scjafojâ la so vôs.

Si va sù, sù fin che a colp si vierz in bande une sgjavadure largje te mont. Il cûr al reste par un lamp come fêr denant di chel sgjanôr di piere, a chel slambri cence misure fat dai umign. Si vierz une largje incassadure tal cûr de montagne e in cheste ore di amont e à il colôr de sierade ch'e je dut intôr tes fueis e tai prâz. Colôr rusin di tiere, di piere e di soreli.

Si ten il flât, e il pinsîr al côr a dute che fuarze ch'al a supade di par dì, in tanc' agn par rivâ-adore a fâ un tai tant indentri te mont e po a slargjâ chê feride ch'al somèe di no crodi.

L'om al è rivât a tant cu la so man di cjâr gnervôse ma picinine. 'O resti come ingropade e 'o cjali chel straplomp di baticûr dut a plazzis di lûs e a tais di ombre, a pineladis grisis o rossis come sanc imbrucjât.

Mi somee une fazzade di catedrâl mitude adun dai giganz.

'O alzi i vôi su chel mûr tormentât che al cjante distes un colôr di li-grie e si piert sù tant alt, ce che si pò cjalâ, e po si siere atôr di un plaz-zâl di maravêe. Ali 'e jere mont e piere, e spissui di aghe sierade, e venis di secui.

E l'omp al à fat chel slambri ore par ore, di par di, vie pai agn. Si è mitût cu la sô fuarze di furmie e al à distacade la mont a bocons, le à sdru-made a planc a planc tocut par tocut.

'O scolti il mazzûl di fier ch'al bat come il pic su la scusse dal len. Il tic-tic s'ingrandis e al fâs revoc sui mûrs de mont che dismonte a plomp e si sint net e precîs come il bati dal orloi tune cjamare bessole.

Chel tic-tic aí è l'uniche vôs dal sgjanôr e nissun lu disturbe e al va-jù fin sul fonz dal cjanâl di Grivô. Di lajù al rispuint il flum cun tun sunsûr di ramaz strissinâz; il tic-tic di buinore fin sere e il flum dut il dì e dute la gnot.

'O cjali i umign: int semplice cence fotis cu la scusse sute e la fuarze ben mitude tai braz. Int cence cjacaris di soreplui, sierade tai siei faz, ma che a voltis 'e à un ridi plen di coragjo. Int che sfide la mont; ch'e à cûr di tirâ-jù tocs granc' come armaróns e di ridusiju 'e misure ch'e covente. Un lavorâ cence malizie, dut a man ancje se qualchi volte 'e coventin i polvars par fâ saltâ-jù i tocs plui ristîfs ch'e mòlin lusignis.

E al è ancje piricul di cjapâsi sot.

'O cjali chês mans duris, dulà che salte-fûr juste la fuarze e la batude sul coni, par dâ la piere tajade a misure.

Simpri bessôi, ma cence malincunie, cu la speranze dai tajuz de dome-nie. Cetanc' agn di fadie? Dís... vinc'... trente? Simpri alì in cunfidenze cu la piere, cul distin de piere cjatât tal sanc dai paris e dai vons. E la mont bisugne tacâle dulà ch'e à la cjâr plui dure. E a'nd'è piere sotvie!

La mont 'e va-sù complene di fuarze fin al Pulfar, fin 'e Val di Mon-tane dongje Torlan.

Piere che apene tajade 'e à il colôr grisulin des robis sieradis, ma che dopo te lûs, tal stravint e tal sbrodolâ de tiere bagnade 'e pâr ch'e sangani.

A zufs, ca e là imbrincât, qualchi sterp di germiscli al môf une fueute minudine che di sierade si piert tal colôr ch'al è intôr.

Pôc lontan a' son lis cjasis dai umign cui antîi di piere, cui seglârs, cui larins cjalz di fûc e di contis, cui ornâz pal vueli scalpelàz in chê piere; a' son i puartons cui pinacui ben intajâz in chê piere, al è il paîs cu la sô glesie incurnisade di chê piere.

Voris fatis quan' che no si doprave masse la piere dai puars: il siment.

Une volte a' dopravin masegn e plasentin, e la mont 'e molave 'e int dure la sô piere dure brincade cun fuarze e volontât.

No cjali plui la feride de mont e lì dacîs o jentri sot une lobie dulà che altris umign a' cjàpin i tocs e ju lavorin par fin.