Massimo, sentât dongje lis scugjelis a spietâ la int ch'e compras la sô marcanzìe e j puartas a vendi i pezzoz, une dì mi fevelà cussì dal progres:

«Gno fradi Gusto si maridà prime di me e al preparà la cjamare dome cul pajon di scofis, pojât su lis breis, parsore i cavalez.

Quant ch'o mi maridai jo, 'o ài scugnût fâ come lui: pajon, breis e cavalez, se no a' saressin stadis cjàcaris in famèe.

Quant che si maridà il fi di Gusto, gno nevôt, al puartà dongje la cocjete cul pajon, e alore 'o ài olût vê la cocjete cul pajon ancje jo, e nissun cjatà nuje ce dî.

Intant il timp al passave, e si maridà ancje gno fi. Lui, ch'al veve zirât il mont plui di me, no si contentà dal pajon e al comprà lis sustis, ch'a jerin une vore miôr.

Alore, come ch'al jere di just, 'o ài olût vê subite lis sustis ancje jo!».