Storiutis

1

Siore Fulvie 'e scomenzà a fâ scuele a Madone di Tarcint. Zovenine e plene di buine volontât, 'e doprà dut il so inzen fresc e vivarôs par insegnâ e par fâsi volê ben.

Dutis lis fameis la laudavin; ma une mari, une dì la fermà pa strade e j disè: \ Siore maestre, jê 'e je tant brave e tant buine che nol ocôr dî. I fruz a' impàrin une vore cun jê. Pecjât nome che no ju spedogle come ch'e faseve la maestre di prin!

2

Siôr Pieri al jere un passionât di antigais. No che lui al fasès buteghe di chês robis, ma se qualchidun j puartave alc di antîc, al saveve dî subite la sô impinion. E nol sbaliave mai.

Une dì s'inmalà fuart, e un parint al pensà di clamâ il predi. Chest al rivà di strade dongje il muribont: si vizzinà e j mostrà il Crist par che lu preàs.

Siôr Pieri lu cjalà fîs, lu tocjà cu la man blancje che j trimave e po, cun tun fîl di vôs: \ Nol è trop antîc \ dissàl \ e ancjemò al è dome di ram indarintât. Ma al pò cjapâ distès sui mil francs...