Zuan Stramp, purcitâr, anzit il «Biel di Stramp», come che lu clamavin, al jere restât vèdul pe seconde volte cun tune masanade di fruz di dâ l'inclìs.

La Rosse 'e jere muarte di part, e il picinin come un paverut al passave sui zenôi di dutis lis feminis lì atôr, che si davin di volte par viodi di lui.

Ma nol podeve lâ indenant simpri cussì. J coventave par fuarze, al Biel di Stramp, une buine cristiane che j viodes de cjase, e pal rest.

In paîs nissune femine no si sares cjapât l'assum di jéssi... la tiarze: no par lui, che nol jere dibant il Biel di Stramp, ma par chê schìrie di fruz che Jesus marie !

Si racomandà ca e là ai amîs e cussì j saltà-fûr une vedranote di jù pe Basse, pronte a cjòlilu: la Sante.

— 'O ài nome quatri fruz di tignî a menz — dis-sàl —. Jo 'o lavori simpri e in famèe nol mancje nie. —

La menà a cjase a la svelte e la sere, atôr de taule des gnozzis, a' slusivin i vôi di dute la sô canae.

— Cemût — dissè la Sante umbride e plene di suspiet — Sonin duc' tiei? —

— Sì — dissàl lui.

— Alore tu sês stât un grant bausarat! No mi âtu dit che tu 'n' vevis nome quatri? —

— 'E je la veretât, Santine. Conte ben: Gjovanin, Tîn, Jàcun e Pieri. —

— E chei altris ce sono? — dissè jê cun stizze.

— Chês... — dissàl lui cu la miôr gracie dal mont — ...a' son frutis!