Gnò fràdi

Al jere un piezzût che gnò frâdi. un frutin di sì e no sîs agn che noi stave fêr un moment, ma al pidave dut il dì come un cjavrûl e nus faseve bati la lune di tant ch'al jere insurît e testart, al jere un piezzût, gjò, che sentât sore un bredul in tun cjantòn dal sotpuarti al stave lì serio e pinsirôs cul cjavut tal pugn. Puare mê mari lu cjaláve, lu cjaláve e spacant il cjâf j disè a Minighine Lunghin ch'e jere daûr a specolâ fasûi: «No mi plâs chel frut uè, Minighine; al è masse cujèt par sêi just. Baste che nol cloci qualchi malan!»

Un pôc preocupade j lè dongje e cjarinant i siei cjaveluz ch'a nulivin di arsît j domandà: «Ce vuelial di po', Dolfut, che invezi di sêi a zujâ coi tiei compagns tu sês culì cussi cujetín e soturno?»