Storie vere

Un biel dopomisdi di setembar ch' al nulive di uve e di ciôns rustîs, me sûr, dos mes cusinis e iò si vin cjapadis su e o sin ladis su la Fuartece d'Osôv a cjatà miò fradi e tre siei amîs che jerin apene tornâs dal campo. Beâs di viodinus, nus menárin jù tal cafè dal paîs e lì tabaiant, ridint, fasint lis storpeosis ma gioldint dentri di nò che nus faséssin lis bielis il timp al jere passât sence inacuargisi e quant che ju vin saludâs par tornà a cjase e jere da un piez sunade l'ore di gnot.

La strade di Osôv a Buje e jè lungie e nó, che o jerin a piduline, vin cirût di scurtale lant ju pai prâz. Doi sols al gambin e vie a giambis portaimi.

Adalt, la lune cu la so muse passude e ridint di buine pa-rone nus faseve lusôr, ma, cjamine che ti cjamine, no si vio-deve une cjase, no si sintive une vôs, nome cîl e jerbe e il vuacà ledrôs d'un cjan in lontanance.

Nó o jerin dutis quatris altis e sutilis e pe circostance vevin mitût il nestri biel vistît blanc lunc fin par tiere e larc tant che une cosse, come che si usave in chè volte e parcé ch' al vignive jù un agazon che al travanave i vues e no e vevin pore che nus sabulis i cjavei, o vevin tirât su la cotule sul cjâf par riparaju: someavin quatri fantasmis scjampâs dal si-miteri a sbrendolon pal mont dai vîs.

Lavin jù, giò, inburidis, contansi mîl pistulós par distraisi e no pensá che si jere bessolis di gnot tal miez de pradarie e che si varés podût intopasi in qualchi malvivent capas di fa-nus bati la lune.

La gnot e jere tiepide e dolce, jerbis e sterps umis di rosade lusivin sot il rai d'arint che jù cjarezave, ma nó passavin fra che belece sence viodile, nó no viodevin cul pinsîr che il tôr dal nestri borc.

Quan' che svoltávin lí de risultive dal Orgelât, olmárin in distance tre oms che vignivin de nestre bande. Si sintin a glazà il sanc e a colà la vite, ma puartávin cimade, e, sence scurtà il pas, continuárin a lá indenant duris e impicotidis come siretis.

Rivadis a pôs pas di distance, s'inacuargín che chei tre biâs a vevin pui pore di nó. Si giavarín il cjapiel, si fasérin tremant il segno de crôs e il plui coragiôs de compagnie cun t'une vôs che i leve jù pal cuel, al domandà: « A la parte di Dio, cui seso?».

Jò (passade la fufe mi jere tornât il morbin e la voe di scherzà), lu cjalai cun tun par di voi sence vite e cun tun bruntulà di ton i rugnii su la muse: «O sin lis Aganis»,

No vevi nancje finît di dilu che chei poares butárin vie il cjapiel che vevin in man, i mulós che vevin tai pîs e ciulânt e mungulant giaculatories tacárin a cori che nancje il vapôr al varés podût staur daûr. E no lí, scrofadis par tiere, che si di-scuestavin a fuarce di ridi.