Dal Bielvedê di Urbignà

Che altre dì o ài stât sul Bielvedê di Urbignà. Ai àn propit reson di clamâlu cussì, di lassù si pò viodi une panoramiche che e cjôl il flât: lis monts cul lôr cjanâl che si invie sù pe Cjargne e pal tarvisian, il disgradâ des cuelinis che a van jù incuintri a la planure o che si slontànin al viers dal confin sclâf; si pò amirâ la operositât dal omp cjalant lis sôs fabrichis incovadis te verde concje da pît dal cuel e si pò viodi chel seguitîf vagolâ di camiòns e di otomobii che a van in sù e in jù, imburîts pe strade Pontebane.

Biel spetacul che al jemple il cûr di une sensazion di bondance, che al mostre e che al dà sigurece tal doman, ma un fregul masse prosaic, masse peât al calcul e tacât a la tiere che si pescje e al pan di ogni dì.  

Provìn invecit a mudâ la maniere di cjalâ chel cuadri, cjalinlu cui vôi de fantasie e dal ricuart dal passât, cirìn di inmagjnâ chê Pontebane cuanche e jere inmò lastrade cu lis pieris dai romans; viodìn, magari cul jutori de storie, lis centuriis romanis che, a pît o a cjaval e cu lis insegnis in teste, si stramudavin di Aquilee a Zui o vicevierse, pensìn a cemût che a fasevin par intindisi, lentivie de strade, cu la int dal sît che a jere di gjarnazie celtiche.

Cussì, intant che o lassìn cori la fantasie o capirìn ancje alc su la divignince de nestre marilenghe furlane. Paraltri, cjalant al viers des monts, cirìn di lâ a furigâ in jenfri i secui di prin di Crist, cuanche i prins celtics, passant pal pas di Mont di Crôs, si sparniçarin jù pe nestre tiere che a lôr e devi sei parude un paradîs.

Chei a jerin i nestris strabasavons, cuntune lôr lenghe, une lôr culture che e jere cetant plui viere di chê dai romans.

Si sa, paraltri che la fuarce e jè fuarce e cussì lis legjons di Rome a cjapàrin la lôr tiere e il popul al deventâ sotan, al mudà crodincis religjosis, al bastardâ la lenghe e vadì ancje la moralitât e cjapâ la sô slocje, obleade a adatâsi al custumâ dai invasôrs che no jerin par sigûr di nò farine di fâ ostiis.

Se si pense, po, a dute la int di ogni race che e à folpeât chê strisse di strade che si viôt stant sul bielvedê, scomençant dai Bizantins ai Ostrogots, dai Langobarts ai Ongjars, dai Avars ai Turcs, si viodarà che chê strisse si tiere, tanche un inmens teatri, e à representât une stesse lungje tragjedie di sanc e di vuere, mudant nome, par ogni dade, i teatrants.

Daspò, se si ûl si po vignî plui indenant cu la nestre fantasie e fâle cori intai secui plui in ca e rivâ plui dongje di nô fin a la dominazion di Vignesie e cuant che i marcjadants che a rivavin de Austrie cui lôr cjars tirâts dai cjavai o dai nemâi, a scugnivin rimpinâsi fin a Glemone a passâ la gnot e a pajâil Niderlek, prin di inviâsi jù pe planure furlane.

Ancje lì o podìn inmagjnâsi che cjars di marcanziis di ogni sorte e che tantis voltis a puartavin scuindûts in cualchi sucrìt, un libri di chei improibîts che al fevelave de riforme luterane.

Vignìn alore, inmò plui incà cul timp, fin a rivâ ai ultims agns dal milevotcent cuanche, daprûf dal stradon a logarin la ferade.

Inmagjininsi chei trens plens di migrants che cul prin florî dai pestelacs a lassavin il lôr Friûl par lâ a cuistâsi il pan in tiere oltrane.

Inmagjininsi i sbufs dal vapôr tanche se a fossin i pinsîrs di cjase che chê puare int e lassave daursi tanche un simbolic rimpin cu la tiere dai lôr vons.

Cetancj agns di sotanance! Cetantis culturis che si son cjavalgjadis sun chel stradon che a viodilu vuê cu la sô schirie di otomobii al pâr cussì anonim.

Cetantis strussiis par chel popul che vuê al è il popul furlan! Ancje tant orgoi paraltri, tal viodi che daspò di tancj agns al à inmò une sô lenghe e une sô identitât!