L’aparechio cence motôr

Olinto Gallina

De vôs di Olinto

E jere une sornade dal mês di mai dal 1937 unevore biele.

Dopo misdì, duc’ i frus di Sacuel dai 14 ains in jù, (chei ch’e vevin 15 ‘e jerin za duc’ a vore su le fornâs) si jerin cjatâs sule “Beorcje” a zuiâ come ogni dì e cun lôr, ancje jò, che in chê volte i vevi propit 14 ains.

A un cert moment, un di nô alzant i voi al cîl, al à scomenzât a berlâ: “Un aeroplano cence motôr, un aeroplano cence motôr !!!! " e chi altris "Al stà colant, al stà colant !!!!", e po ancjemò: “Al cole, al cole”.

Al rivave dal nord, diresion Glemone, e a voli al jere a une altece di mil metros, ma un tic ae volte si sbassave. Si dirigeve viers Mels, sbrissant tal ajar come une ucelut cidin cidin.

Rivât ae altece dai “Cucs” al à fat un gîr di 360º grâs puntant dret viers di nô, sul teren des Trentines, chel che, 40 ains dopo, ‘e vignaran montades les baraches dai teremotâs di Sacuel.

Viodût ch’al stave tacant a tocjâ cjere, ‘i vin comenzât a corî incuintri, cence pensà lontanamentri al riscjo chi lavin incuintri; l'aparecchio nol veve un carel cun ruvedes, al sò puest al jere un patino che al slitave sul teren. Rivât dongje dal sdrup che al segnave el confin dai cjamps e le "Ferade", l'aparechio, alt, a vôli, un metro e miez, si è fermât di colp, pojansi ben planchin su le ale gjestre.

Nô frus, ‘i sin lâs dongje cui voi sgranas e el cûr in bocje tra emosion e curiositât; el pilota al stave sule ponte de fusoliere, e al jere protet di une cupule trasparênt. A un cert pônt, le cupule e je lade indenant e le gjambe sinistre dal pilota ‘e je jessude, restant ferme par cualchi secont a cavalot dal bordo.

Subit dopo, petant un salt, al è smontât, e si è girât viers di nò. Les primes peraules che al à dites, e son stades: "Polizei bitte", e nò: “Al fevele muc, al fevele muc! ”. Nus cjalave preoccupât, forsi al veve pore pe sô incolumitât o par chê dal aparechio: al puartave un vistît civîl, cun camisole e cence golarine. Pôc dopo, e son vignûs dongje i vecjos dal borc, i ricuardi tra i tânc, Pieri Taboghe, Gjenio Moschetin, Rico di Chic, Jacuci De Cosse, che te magjorance dai câs, emigrans di lungje date, e cognosevin ben el todesc. Alore el pilota si è calmât e subite ur à racomandât di fà in mût che el aparechio nol fos ruvinât des tantes persones che ormai i giravin atôr con curiositât e maravee.

L’aliant al vêve une aperture alâr di nûf metros, di sîs invessit ‘e jere le lungjeze de fusoliere. El telâr al jere di fiêr e cuviert di tele cerade, cualchi imprest di volo al jere metût sul cruscot de carlinghe; nol vêve le radio.

Dute le int ch’e jere vignude dongje e discuteve in maniere vivarose su ce ch’al jere succedût, ‘e cjalave le svastiche che l’aliante al veve stampade sul tamon di code fasint mil suposisions sule sô provenience e sul motîf che lu veve puartât proprit lì.

El pilota, plui tart, al contarà che l’aliante, partît di Salisburgo - (l’Austrie, no ere ancjmò stade ocupade de Gjermanie) , al jere stât tirât di un aparecchio a motôr che lu veve puartât a quattrimil metros di quote.

El fin al jere chel di sorvolà le “Alpi Carniche” e le mete finâl ‘e jere l’Aeropuart Militâr di Cjampfuarmit.

Quant ch’al jere cuasi rivât però, i son mancjades les corins d’aiar justes, e al veve scognût fa un ateragio di furtune.

Le notisie e jere corude ae svelte parceche, di lì a pôc, e jè rivade difat un’automobil cun socios dal “Aereoclub di Udin” che si jerin ofiers di ospitâ el pilota a cjase lôr.

Prime di la cun lor, el pilota al à stacât le grande ale, tacade sore de fusoliere, che je stade puartade da un trop di zovins tal magazzin de “Stazion Ferroviarie", distant un centenâr di metros dal punto di aterragjo; le fusoliere invesit e je stade puartade tal curtîl de cjase di Taboghe e taponade cun tun telon ch’al vignive doprât di Pieri, per cuviergi i cjars dal fen.

Ienfri les tantes persones dades dongje, mi visi ben dal fotografo Tarcisio Baldas. Lui, montât sul cjar di “Franco Perescine" ch’al stave tornant dai cjamps, cule sô "Leika" al à lassât a chei che vignaran les fotografies di chel fat (chi stampades). “Cisio” al à fat meti in pose, le Maestre, el Predi, i frus, i vecjos, les femines e parfin une copie di nuvis frescs di altâr, insieme a dutes les tantes persones ch’e jerin rivades.

Intant si jere fate sêre, el pilota al jere partît, l’ indoman e jere une sornade di ploe e de Austrie e je rivade une machine e no ‘i vin iudât a pojâ l’aliante parsore di un carel ch’e veve al traino.

Pôc dopo si è savût che l’aliante partît di Salisburgo nol jere un, ma quatri, e che un atri al jere aterât sul “Ciman”; l’intenzion di cheste operasion e jere chèe di bati el primât di “Volo a Vele”, ‘i pensi che tai registros dal aeroclub di Udin al sedi cualchi scrit a proposit di chest tentatîf mancjât.

Finît dut, al restave in no frus el ricuart di una sornade memorabil, che nus à furnît el motîf par discussions, idês fantastiches che i cirivin di meti in pratiche tai nestris zucs di ogni dì. Sui “Pravis”, cun telons e frascjes si butavin ju pai rivâi e sdrups fasint fente di planà come un aliante.

Mi visi ancje che une volte, montâs su sul puint de ferade, ‘i vin costret un nestri amì a improvisasi paracadutiste dopo vei lazât sule schene un telo, gjavât a une grande ombrene. Dato che nol veve mase voe di butasi, qualchidun di no ‘i à dade une sburtade par furtune al è colât sul rivâl, cjapant dome une buine insacade e un pocje di pore.

E jerin zucs semplis, ma cusì coinvolgens che ‘e an lasât in me un ricuart che no pues scuardâ come chel di un aliante che si pojave planchin sui prâs e che per me al reste el simbul di un mont ormai lontan, plen di misteris e di aventures maraveoses.