Le cjase dai spirts

Olinto Gallina

Le conte lui .... Olinto

Le cjase dai spirts

J jerin tal 1949, subite dopo le vuere: agns neris di miserie, cun pôs divertiments, cuant che une dì e scomence a slargiâsi le vôs che in tune cjase e jerin i spirts.

Te cjase e jere a stâ une femine zovine, sposade cun tre fruts piçui: el omp al lavorave sule fornâs e di pôc al ere muart el missêr. Tra brût e missêr nol veve corût bon sanc e lui, prin di murî, al veve zurât ch’al sarès vignût a tirâle pai pîs. Di gnot, di fat, le int di dulintôr e diseve che ta chê cjase si sintivin rumôrs stranis.

J podês dome crodi, in cuatri e cuatri vot di fûr de cjase si jere dât dongje un trop di int che vignive di dut el paîs, ducj a curiosâ, a domandâ, a fâ suposizions e cjacares.

E jere vignude sere e, clamâts di cualchidun, e jerin rivâts ancje i carbenîrs, che spesseavin a mandâ a cjase le int: “Via, via andate a casa! Ci penseremo noi a vedere cosa succede qui!”.

Nô ’zovins però, no volevin savent di pierdi chel divertiment e dopo tant insistût, cule promesse di no fâ monadis, j vin rivât a convinciju a restâ. Cuissà, salacôr ancje lôr e vevin voe di fâ cualchi ridade a cussì si sin sentâts ducj sul laip tal curtîl di cjase e j vin scomençât a spietâ el “Spirt”.

E jere une serade maraveose, frêt di cricâ, ma un lusôr di lune ch’al faseve propit pensâ a chês gnots di spirts e di striis che ti contin di frut tes flabes.

Les ores e passavin ben planc, tra une conte di pôre di une bande e une ridade di chê âtre par fâsi coragjo. Tôr des undis un carbenîr stuf di stâ lì e plen di frêt, voltansi viers le cjase, si met a berghelâ par napoletan: “Oilà spirito! Vieni, picchia..., facciamo sto verbale che poi vado a dormire”.

Nô, j podês crodi, j scugnivin tignîsi le panse di tant ch’j ridevin.

E rive miegegnot, le ore fatidiche! A un cert pont j sintìn a criçâ de bande dal piûl, po un rumôr di pas: toc... toc... toc.

El silenzio si fâs di tombe e ducj i vôi si sgranin a cjalâ d’indulà che al ven, le pôre si tajave cul curtis, cuant che si sint ancje un screehhh. Ben planc une puarte si vierç in sclese e une muse e ven fûr un tic a la volte, al passe un moment ch’al pâr un’ore, po si sint une vosate: “Isal nuje di gnûf?” (e jere le vôs di Toni ch’al jere stât clamât di chê femine a durmî cun jê... par fâ cuintri ae pôre).