Viers les dîs di sere, cun dute le gubie, jessint de ostarie j incrosìn Lussie, le femine di Vigi dal Fôr che nus domande: “Fruts isal ancjemò viert?” “Si, Sii!” j vin rispuindût riduçant par sot. Nô, di fat, j savevin che j plaseve el tajùt.

Dopo messe, come di tradizion, si lave a bevi el brulè e si fasevisi i augûrs. A un cert pont, i sintìn che difûr da l’ostarie cualchidun al berghelave: “Si è picjât Vigj dal Fôr! Si è picjât Vigj dal Fôr!”.

A sintî cussì j partìn ducj di corse e rivâts a svuel a cjase di Vigj, lì j jentrìn. Chel puar omp al jere picjât, cun tune cuardute, in tal pomul di une puartele che stave in alt tal mûr.

Ce che al è sucedût dopo, lu ai ancjemò denant dai vôi come s’al fos sucedût îr: une scene degne di une conte di Edgar Allan Poe.

Bepo nol à vût esitazions, al à tajade subite le cuarde e al à pojât parcjere chel puar omp, Toni e Meni si son metûts subite a fai le respirazion artificiâl. Lussie, le femine, un pôc benzinade e berghelave impins parsore di lui: “O ce pôres di fâmi cjapâ, tu viodarâs ve!!! Sonin robes di fâ, brut mussàt, tu mes pajarâs!!!”. Sef, al cirive di parâle vie berghelant: “Vait vie po, vait vie, vait vieee!!!”.

Pôc lontan, simpri ta chê stansie, al jere Zuan ch’al tignive le cuardute in man e le tajave in tancj tocuts: le mularie e dute le int che intant e jere rivade si faseve intôr berghelant: “Ancje a mi un tocùt, ancje a mi!”. Parceche, come che j savarês, si diseve che le cuarde dal picjât e puartàs furtune.

Pieri, fûr de puarte, al spietave el miedi e lant su e jù pe stansie al sberlave: “I miedis di vuê no servissin a nuje, e fasin ce ch’e vuelin, e lassin murî le int!”. Propit in chel al rive el miedi, e dato che al veve sintût dut, cjalantlu di stros j rispuint: “Vô j sês nassût par fâ mâl, cu le vuestre lengate!”, po jentrât te stansie e viodint chel davoi al zigà: “Fûr ducj cumò, che culì nol è marcjât!”.