Savôr d’astât, ombrenûl di grancj arbui frindôs, nulôr di crocants a bon marcjât e sclopet di tîrs al bressai; chest il gno ricuart des mês sagris a Buje.

Une place plene di int che si intive, si salude, si incrose intun davoi di vôs, di musiche e di colôrs, un misturâsi di interes disferents fra di lôr: un al cîr di intivâ un sensâr par vendi la vacje che no reste plene, un al va cirint chel che al à bêçs di tornâi, i fantats che a cìrin furtune in amôr e ducj che si gjoldin chê clime di fieste.

Nô canaute o vevin vendût lis piels dai cunins e chês dai farcs al pielâr; o vevin stât a rotans par ducj i fossài par puartâi al peçotâr, tocats di fiêr, di ram, o plomp di ogni sorte, par dâ dongje chei cuatri carantans che nus devin plen dirit di sintîsi part dal popul de sagre.

Si gustave in premure in chê dì, e po, vie di fichet, ce a pît ce in biciclete, par stradis blancjis sboentadis dal soreli dal mês di Lui, vie al viers di Buje.

O vevin spietât dut un an par che tornàs la sagre e cumò e jere rivade, ducj nô o vevin parecjât, di daspò mai in ca, la stangje di len pleade sot dal pujûl là che si varès vût di picjâ lis cjampanutis di crep, rest di un’antighe usance dai fornasîrs che lis cueievin intai fôrs des fornâs di dute Europe par puartâuries in regâl ai lôr fruts cuanche a tornavin a la fin de stagjon. La dì dopo de sagre, no jere cjase intai paîs dulintôr che no ves un pâr di cjampanutis.

La sere po, la fieste si insiorave ancje di un bal; un bal sul breâr e, stant che in chei timps, su lis sagris, ligrie a’nd’jere tante, ma beçs pôs, i fantats a scugnivin stâ atents a cemût che a spindevin chês pocjis palanchis che a vevin; se a vessin pajât l’entrade dal bal no varessin vût bêçs par pajâ la bire o la gasose a la fantate e alore si fermavin a cjalâ chês cuatri cubiis che a vevin bêçs avonde par chel e par chel. I festegjîrs, paraltri, viodint che no incassavin avonde par cuviergi lis spesis, a vevin burît-fûr un sisteme par scludi ducj i pôs carantans che inta chês puaris sachetis a sglinghignavin: a vevin inventât il bal cu la cuarde.

Si tratave di comprâ biliets par chei tancj bai che si indindeve fâ, intant che dôi di lôr par fâ la sielte dai pajants a passavin cuntune cuarde tirade a scjavaç dal breâr. Chel che al voleve balâ al passave dilà dant un biliet, chel che nol voleve al restave di ca sul ôr dal breâr.

Cussì ancje chei che a vevin pôs bêçs a rivavin a fâ cualchi bal e ancje a bevi la bire e a levin a cjase nome cu la sfodre de sachete, ma contents di vê contribuît al davuelgisi de grande sagre.

Jo cui agns che o ài o soi stât tant un di chei des cjampanutis, che un di chei dal breâr e o ài viodût a mudâsi il mont des sagris intun mont di “Festivai”, o ài sintût lis sunadis di armoniche e liron e o sint, magari di lontan, il strepit de musiche moderne, o ài girât il mont e no mi doi di maravee di nuje, ma o soi convint che chê lûs di gjonde che o vevin nô intai vôi in chei timps di miserie no si le viôt plui intai vôi de zoventût di vuê e mi domandi se la zoventût di vuê e varà, un’altre dì i biei ricuarts che o vin nô?

Cualchidun mi disarà che i ricuarts a son robe dal passât e che il passât al va dismenteât par cjalâ il presint, il vuê, ma jo o podarès rispuindi che il vuê nol è altri che il passât di doman.