Se

Dòs mans grandis tanche pladinis, cu lis venis ch'a' parevin vuarbisinis, une vite di lavôr daûrsi e une miserie stabil. Pront al scherz e a la mateade, mai discoragjât nancje in tai momenz plui imberdeâz, Vigj Conciert al strissinave pe strade de esistence la sô numerose famee: la femine e sîs fîs ch'a podevin stâj duc' in-t-une sbrinzie; infat dal prin al ultin 'e coreve une dade di nome siet agns.

Lu clamavin Conciert parvie che lui nol veve pei su la lenghe cuanche si tratave di meti a public la sô miserie, anzit, al diseve simpri che là di lui, la miserie 'e cjantave in coro e cuanch'al lassave la compagnie par tornâ a cjase, al usave a dî: "Us saludi, 'o voi al conciert!"

Lis veve provadis dutis par rivâ-adore a diszuniâ chês tantis bocjs ch'al veve a sotet, ma duc' i siei sfuarz, par vêr, no davin une grande risulte; cussi une di al decidè di mudâ di mistîr e di metisi a fâ il pezzotâr. Un so amì che chê vore al jere 'za di un piez che le praticave, j veve dit chal jere un afâr di fâ bêz.

Cussì Vigj Conciert si jere dât dafâ par cjatâ-fûr une camionete di seconde man ch'e las ben pal so câs, Par cuistâ chel imprest, paraltri, j coventavin tresintemil francs e il pùar omp nol saveve indulà lâ a batiu. Daspò di vê provât a domandâ chê sume a amîs e parintât e di seise sintude a refudâ di duc', si decidè di lâ in bancje.

Tal grant ufici cidin si sintive nome il ticâ des machinis di scrivi e il cibiscjâ dai clienz cui implejâz; cuissà parcè che la int cuanch'e fevele dai siei bêz, 'e sbasse simpri la vôs tanche se si vergognas di vêu inniment.

Vígji al spietà in-t-un cjanton che il banc sl diliberas un

fregul par podê domandâ ce che j coventave; infin 'e rivà la sô volte e lui, al implejât, j domandà di fevelâ cul diretôr parvie di un imprestit. Al fo fat passâ tal grant ufici de direzion e si cjatà muse a muse cul diretôr che, come ch'al capìte tai pizzui paîs là che si cognossisi duc', lu saludà cun fâ afabil e muse ridulint: "Bundi Vigj! Ce us menial ca dí nô!" "Eh, sior diretôr, 'o vares di bisugne di vê uns cuatri francuz ad imprest par cjoilmi une camionete pal gno gnûf cumierz ch'o ài di metimi a fâ". E li si metè a contâj dut ce ch'al intindeve di fâ e trop ch'al sperave di vuadagnâ.

Il diretôr al cognosseve l'onestât e la buine volontât dí chel pùar omp, al saveve che, par vêr, cun chel mistîr al va= res rivât a tirâsi fûr des pastanis, ma il so dovè di sorestant de bancje j imponeve di domandâj piezarie par chei bêz ch'al vâres vût di dâj ad imprest. "Ise vuestre la cjase là ch'o staìs?" - j domandà.

"No siôr, magari!"

"Veiso cualchi bocon di tiere in dite vuestre o de femíne?" "Nancje une jeche, nome la strade par la a messe. " "E alore nol è pussibil che la bancje 'e ríscj. E se i afârs a' vessin di lâus mâl? E s'o vessis di inmalási? E s'al ves di capitâus un acident cu la camionete? A'son masse lis pussibílitâz di riscli cence nissune di sigurece!  Mi displâs, Vigj, ma 'o varessis di puartâmint almancul une ch'e sedi a vuestri favôr. "

"Ma siôr diretôr, - al provà a dîj Vigj - lui mi à dineât il credit nome cui se: se al sucêt cussì, se al capìte culà. " "Eh Vigjut, il se, tal nestri lavôr al conte cetant! Senò nô no saressin chei ch'o sin. "

Cun chês cuatri peraulis che j soboravin tal stomi, Vigj Conciert al tornà a cjase cu lis mans scjassant. Tal indoman, paraltri, si tornà a presentâ dal diretör de bancje tignint il so frutut plui grant pe manute e j disè: "Jo, siÔr diretôr, îr 'o ài imparât di lui la grande impuartance che si à di dâj a chê pizzule peraulute ch'e jô il "Se" e alore 'o soi chi a puartâj la mê garanzie representade di gno fi il plui grant ch'al è chì cun me... "

"Ma chel li al è nome un frut che nol à nuje in dite sô " -al dísè ridint il diretôr.

"Sí, al è un frut, ma Se... mi va in 'seminari come che jo 'o intint di mandâlu, e Se.. mi devente predi e Se.. lá so coce 'e jè buine e lu fâs deventâ vescul e Se.. cun-t-un fregul di furtune m'al fasin gardenâl e magari ancje pape, cemût le metaressino cul credít? Varessial lui il fiât di dineâj un credit di tresintemil francs al pape?"