Il mâl de veretât

I jere capitât dongje un strani mâl che nissun miedi nol rivave a vuarîlu e nancje nol saveve ce che si clamave e cussì i vevin dât il non di: mâl de veretât.

Dut al veve scomençât cuntune grande fìerade che i veve fat pierdi i sintiments par un pâr di dîs e daspò, çuant che al jere tornât in se, al veve tacât a dî a di chei che i domandavin alc, dute la veretât e dut ce che al saveve e fevelâ cun lui al jere tant che cjalâi dentri tal cjâf.

Nol sares stât un grant mâl, par un cualsissei om, ma par sâr Pieri Mariet, Conseîr Regjonal, al jere un mâl discomut che i noseve pe sô incarghe politiche, pe sô cariere e i impidive di fâ il conseîr; anzit o disarai ancjemò di plui: i veve cjolt ancje la libertât; di fat, di cuant che al veve scugnût dimetisi di Conseîr Regjonâl, la direzion dal partît, no cate che lui nol fos plui in servizi, i vevev metût un sofêr e une vuardie dal cuarp che no lu lassavin mai bessôl, massime cuant che al vignive cualchidun a cjatâlu.

«Ma parcè mai, al protestave sâr Pieri se no vevi vût mai dutis chestis
atenzions nancje cuant che o jeri in zonte, prin di inmalâmi?»

«Eh sì, propit prin di inmalâti! - i rispuindeve Rose la sô femine - Cumò tocje stâti simpri dongje par che no tu fasis dams».

Di fat, cumò cuant che cualchidun al voleve fevelâ cun sâr Pieri, la vuardie dal cuarp si plaçave dongje di lui e si puartave tant che un ufici di censure.

Une dì che un gjornalist di un piçul sfuei locâl al jere vignût a fâi une interviste, i jere tocjât di viodisi a tratâ cussì:

«Jo - al tacà il gjornalist - o aî di fâi une domande sul proces di coruzion che al à in cors l’assessôr des voris publichis; a sô parê, isal vêr che al tirave lis mandulis par favorî ciertis ditis?»

«Par chel che o sai jo, - al tacà sâr Pieri - sigurementri al tirà...» - nol rivà adore a lâ plui indenant che la vuardie dal cuarp i metè une man su la bocje e, rivolzude al gjornalist cun fâ sevêr:

«I parino domandis di fâ a di un convalesent di une malatie come chê che al à vût sâr Pieri?»

«Poben, indi fasarai une altre: Ce i parial di chel proces che al à in pîs il cuestôr, par abûs di podè?»

Pieri cence nancje cencenâ un lamp al rispuindè:

«Jo o crôt che il cuestôr al vedi pardabon abu....» La man de vuardie i plombà su la bocje che e parè dibot un scufiot; e dal moment al gjornalist:

«Ma ce pocje fantasie che al à lui! àl sa nome soborâ inte velme!»

«Alore i fasarai une domande personâl sul so stât: Cemût la salût ? La sô malatie vadie sfantantsi?»

«Il gno mâl nol è grâf, nome che mi fâs dî simpri la ver..» - la vuardie e intervignì metintji une man su la bocje e rispuindint par lui:

«Sâr Pieri al miore dì par dì e in curt al sarâ vuarît!»

« Sì, - al disê Pieri - e alore no mi metarês plui la man su la bocje cuant che...»

Cheste volte la vuardie i taponà la bocje cun dutis dôs lis mans; cjò, al steve par pronunziâ la peraule plui temude in pohtiche e chest no si podeve permetial.

Cheste gjile si ripeteve ogni altre dì cuant che cualchidun al vignive a fevelâ cun lui; fin che une volte, a la domande di un gjornalist: «Crodial lui che i politics a sedin; ducj bausârs, pal interès propi o par chel dai lôr partîts?» la rispueste e rivà dopo di un moment di riflession: «I politics no son mai bausârs e no metin mai i propis interes denant di chei de nazion ; a son la clas plui oneste e fîdabil che no mude mai di idee e cence il lôr operât e lis leçs che a fasin, dut al sarès plui complicât. Ma cumò al à di scusâmi, che o ài tancj impegns e robis di fâ».

Cussì, congjedât il gjornalist, al tornà a pognisi sul sofà par lei il gjornâl.

La vuardie dal cuarp e telefonà dal moment a la direzion dal partît e, pôs dîs dopo, le gjavarin di chel servizi che aromai al jere deventât inutil: si jerin convinçûts ancje lôr che sâr Pieri al jere vuarît.