Al vève tant plovût e i nùi a prometevin ancjmò ploe; cussì o voi a càis par metiu in purghe te semule.

Me ave, de bande di me mari, e vigneve di Palme, uè Palmegnove. A ere 'ne ninine di vecjute, maestre ancje iè, e mi contà tantis robis de so ète; ma chê che mi restà plui te mermorie a jè la cjavalute blancje di so pari.

A mi contave, che ninine di vecjute, che so pari al jere impegnât tal '48 tè difese di Palme assediade dai mùcs da diviars mês. La int a pative la fan e i soldâz a ierin cenze munizion!

Miò bisnono al faseve pârt dal comitât de resistenze cuintri i austriacans che assediavin Palme; e i sorestans a jèrin impegnâz in permanenze, mo' in comune a organizà la susistenze, mo' sui fuartins a da coragjo ai combatens pe resistenze, mo' su la plaze a calmà la int.

Il miò vieli al jere un pôc tarondut di vite, tant ch'al vève, dome par se, un caretin tirât di une blancje cjavalute.

Il famèi la governave par ben e a dibinore la meteve fra lis stangjs e la stacave dome la sere. La cjavalute e partive savìnt che vève di fermasi ae comune, a ogni caposaldo de resistenze e, si capis, a ogni ostarie cognossude dal so paron.

E cussì ogni zornade de batàe di Palme e la sere la cjavalute e rivave a puartà il paron a cjase; e restà 'ne vore di voltis tacade tal caretin fin dibinore. Cetantis voltis che la poare bestie e steve ferme sot la comune di Palme sot la ploe e il soreli, intant che disore a discutevin di bês, di farine, di aghe, e di munizions che mancjavin!

Dutis robis che riguardavin ne zitât assediade.

Ma la cjavalute blancje e steve simpri ferme spietant il so paron!

Passât l'assedio, tornà la calme! Ma miò bisnono nol rivà a gloti la rèse e di displasè si lassà murì! Cetantis voltis il famèi al cjatà la cjavalute blancje ancjmò tacade a dibinore tal caretin!

E cussì ancje la ultime volte che puartà il paròn a cjase! Poare cjavalute blancje! No viodè plui miò bisnono! No mangjà plui e cussì e murì di displasè!