Al vève tant plovût e i nùi a prometevin ancjmò ploe; cussì o voi a càis par metiu in purghe te semule.

O passi dongje un frascjam, quant ch'o sint piulà uceluz.

O viârz la cise e ben platât fra i ramâz a forcjàs, di savut cun stecuz, pantàn, plumis e bombâs di poul al é fat un biel nît di mierli.

Cinc uceluz ancjmò cul plumin, spalanchin il bec apene che sintin mescedà lis frascjs.

La mari pôc lontan e piule di dolor viodint lis sôs creaturis in pericul.

O resti stupidît a viodi tant jngen e precision tal lavôr di chel nît.

Intant che pòare mari e vaìve e saltàve dulintôr par pore ch'o tocjàs i siei fis.

O rivi in somp la taviele quant che torne un'atre slavine; la cjalze e iere già plene di quarnesuz e o tornai indaûr dut bagnât.

Passant dongje chei poars uceluz, volevi viodi se si bagnavin, e o stevi metint il cjapiel parsore di lôr, quant ch'o viodei che poare mierle cu lis alis slargjadis sore i siei picinins, e mi cjalave come par domandâ pietât; e no si moveve!

Al slavinave che Diu le mandave, simpri che poare mari e iere lì ferme a difìndi e protegi lis sôs creaturis e mi cjalave.

O soi restât cul cjapiel in man e un grop mi sierave il cuel.

La ploe e vignive jù; ce tant soio restât lì?