Cuant ch'o passi su la Osovane, a une mîe disòt dal forcjas di Cjestelîrs, o viôt 'ne crôs di fìâr e m'impensi di cé che mi contave miò pari diperdoni.

Viârs il milevotcent, Napoleon si cjatave in Friûl e al leve mo cà mo là, a riscjelà zoventût pe so armade. Al ven a stai che 'ne dì al lè ancje tal seminari di Udin, là che cumò al é el tribunâl c l'ufizi leve.

O vèis di savé che un grum di zovins e levin in siminari par studià, no erin scuelis e il siminari al contentave chei di paîs cu la misare rete di un purcit, dîs stars di blave e un cuinc' di vin a d'àn.

El consul francês ur tignì prasapôc chest discors: Bonedès di frutàz, ce faseiso ca dentri? Ne bês ne tele; vignît cun me, o varèis ce che no vèis mai sperât, i girarèis il mont ben vistûs, ben passûs e no polente e crodiis come ca dentri, o cjatarcis venturis, feminis, bês, e ogni ben di diu.

Se propit o volèis spiticasi a deventà predis tornarèis chì dopo finide la uere. A un slach di zovins ur plasé la sinfonie e ai lèrin daûr.

O vèis di savé che in tal seminari di Udin si cjatavin ancje tre Piamons, Pieri, Batiste, e Bastian. Dai tre, Batiste e Bastian a erin fradis, Pieri al jere cusìn; i doi fradis a butarin jú la tonie e lèrin cun Napoleon.

Batiste Piamont l'ere un bocòn di zovin grant e grués e lu fèrin subite granatîr dal consul, Bastian plûi studiât e pratich di cons lu meterin te susistance.

E cussì e lèrin in Spagne, la ti faserin i purcituz (robis di no olsà a contà) in Olande un pôc mancul; insumis simpri daûr di chel mataràn che un pôc a la volte al deventà imperatôr.

Ti lèrin ancje in Russie e Bastian al fasé simpri di cjarugjèl a so fradi. Dopo la Beresine lu prudelà fin in Friûl sun tun cjâr di fen, cun sot platâs i lor guadàins....

A cjase che fèrin a metèrin iudizi e Batiston ti comprà un sclop di tiare tra il Curgnul e Scjandelâr, dongje de Glesie de Madone de Nêf; ti fasé 'ne biele cjase, 'ne grande stale, un grant curtilon, un vignâl e 'ne braide di fa la biele vòe, insumis al deventà un bacàn. I siei bûs a sflorezavin simpri i marcjâs e ti cjapave biei napoleons.

'Ne biele dì d'aviarte Batiston dai Piamons ti mandà doi famèis fin a Lauzac, pocjs mìis di Palme cun tre pârs di bûs ben passûs. Doi dîs dopo Batiston si cjatave al marcjat di Palme cun chèi sîs besteons e nol sfadià masse a vendiu ai triestins, buine gramule in che volte come cumò.

Insumis, sèial che la robe a jere biele o par vie de puartade da l'omp e dai sièi moschetons a fildifiêr, ce ch'al domandà al cjapà e si cjatà cun tun slach di napoleons d'aur dopo fat l'afâr.

Ti spedì a cjase i famèis, simpri a piduline, e lui al passà di ostarie in ostarie fin a Udin.

Al jere plen di vin come un brincjel ma nol piardé mai la tramontane dal dut. In chês etes a giravin bandîs, disertôrs e int cence diu e dut pe miserie di bati cui conis, a ere plui int pronte a doprà il curtìs e la sclope che la pale; lu disin lis barconètis picjulis che fasevin tes cjasis in chèi timps.

Al ven a stai che cuant ch'al cricave-dì si cjatà disore Felèt daûr une cise; la cjoche a ere stade grande e il cjâf i pesave ma subite al lé a cirì i napoleòns dai bûs vendûs a Palme.

Al tirà un suspiran cuant che u cjatà leâs in une manie de camisole; no i pareve vere di vele passade slisse in miez a che gjenissie che girave.

In che volte s'impensà che dopodut l'ere stât iudât dal Parieterno o dal so sant che i veve tignûde cjalcjade la man sul cjâf fin in chel di, s'ingenoglà e al prometé di no dismenteà che ultime gracie vude cence ment e cussì dopo pôs mês al implantà che crôs di fiar su piere a triangul che si cjate dador la strade tra Cjestelîrs e Felèt.