"Ambui „ e "Quàrgnui „

El paîs al ere dividût ìn doi partîs: chei di sore «cuargnui» e chei di sot «àmbui». Le cause de division 'e ere vècie, e ogni ocasion 'e ere buine par fâsi le fòrcie, par cioisi vie e magari par clapadâsi. Par une vorone di ains chei di sore 'e vevin el Sindic tal Munizzipi, che si ciatave a jessi te contrade di chei di sot; el Sindic, un grant bon omp, al steve cun dut el cûr cui soi «cuàrgnui», ma in Cumun al doveve stâ cun duc', pal bon ordin, pe justìzie e pe pâs.

Sichedùncie 'e ven la volte che in paîs si doveve fà lavôrs impuartàns; cioiè, o ingrandî i doi Simiteris che erin, chel dai «cuàrgnui» e chel dai «àmbui» deventâs masse pìzzui par vie che la înt 'e cresceve come lis ruis te verze, opùr fâ un Simiteròn unic, tant par chei di sore che par chei di sot.

Ma 'o siavês, quant che el diaul al ûl meti la code.... Cussì le à metude in ché volte tra el Sindic e i soi «cuàrgnui».

Propri in chel timp, lui, el Sindic, al veve di tirâsi su une ciase, in t'une so braide che ere quasi par cunfìn tra «àmbui» e «cuàrgnui», e chest, che si sa, al veve fat invelegnâ a muart i «cuàrgnui», senze che lui nàncie' par scherz al vès pensât di fâur un dituart. Si riunìsc la Giunte par l'afâr dal Simiteri, e il Sindic, sentât tal miec' dai soi Conseîrs, si met a lei le relazion su le utilitât, pe casse dal Comun, di fâ un Simiteri sôl par dut el paîs, in t'un luc che al fòs comut tant par chei di sore che par chei di sot.

Al leeve lui (e chei di sore 'e stevin cu lis orelis spizzadis) quant che al ven fermât da un pugn, petât su la taule cussì fuart che el calamâr si é struciât e l'ingiustri al è curût sul solâr.... Chel pugn lu veve petât un «cuàrgnul», un tipo che nol veve pore nàncie dal diaul, e ce che al diseve al doveve jessi Vanzeli; el qual, jevât in pins tant lunc che al ere, al urlave su la muse dal Sindic; «Mierde mostro.... 'o savìn che tu tu às l'idee di fâ la ciase plui di sot che di sore.... ma mierde. 'o ripèt: tu savarâs che nó no larìn miai a misturà i nestris ues cun chei di sot.... E baste par uè.... ».

El progèt di un sôl Simiteri al è lat a clar, come tantis robis bielis di chest mont, e «àmbui» e «cuàrgnui», come prin, 'e son lâs a durmî par simpri tai vècios puesc'; chei di sore tal «Picêt» e chei di sot a «San Bortul».