Il bosc, come 'ne verde murae, al jere lì a man gjestre de fornâs, squàsit di rispirâlu tal so flât plui segret.

Agnul Barazzut al cjapave dispes la sô cjocute la domênie e lis fiestis comandadis, ma, in particulâr, in dì di marcjât, 'e veve dì séi sacrosante.

Al partive di cjase a buinore e la prime tape la faseve lì di Ricardo. Po al passave là de Suble o de Rosse di Bulot a mangjâ lis tripis. S'al veve cun sê la femine, al passave di barache in barache par còmpris, dal domo fin lajù di Jogne, ch'al 'ere ce sielzi. A misdì la femine 'e lave a cjase e lui al restave: il marcjât, par lui, al scomenzave in chê volte.

Un quartut par lûc, no di plui. Al passave dutis lis bêtulis e quant ch'al jere strac si fermave e al tacave a fevelonâ di bessôl.

— Barazzut, ce còntistu? —

— Fin al dîs...! — e al rideve sot coz, sfreànsi lis mans.

Une dì si fermà in plazze e, sigurât su lis gjambis a larc, cjalant il Municipi, al scomenzà a barbotâ:

— Dîmi mo, tù... ma la veretât, sastu: astu mangjât plui fen tù, o bêz chei massepassûz di là dentri? —

Cui ch'al veve di rispuindi al jere il bò — o, s'o volês, la vacje — ch'e je piturade su la fazzade dal Municipi e ch'e je la steme dal Comun; i «massepassûz » a' jerin i sorestanz dal Comun.

Quant ch'al fò strac di businâ si metê in viaz par cjase, misurant la strade, inzopedansi dispes, ma cence colâ. In Sotfrate, però, al sbandà un pôc di plui, e jù tal fossâl tant lunc ch'al jere, cu la muse par sot.

Cu la sflàcje si drezze, al prove a jevâ sù, ma al sbrisse e al torne jù come un sac di sêmule.

— Sant Antoni judàimi a saltâ fûr di chì. No ài vôe di passâ la gnot a cjalâ lis stelis. — Al sgripie, si fâs fuarze, ma al torne a plombâ jù come prin.

— San Valantin, ch'o judais chei dal mâl dal azident, dàit 'ne man la puar Barazzut! —

Si cjape tes bachetis de cise che si crêvin come jarbe, e al sbrisse di gnûf, cu la panze paràjar.

— San Michêl, tù che tù âs lis alis tant grandis, sù, jùdimi: aehop! —

Dut dibant. Al colave ogni volte e al faseve simpri plui fonde la cove e al sintive za l'aghe e i lavaz 'tôr di sê.

Al clamà in ajût altris sanz: piês cun piês.

Alore, dopo di vê polsât une dade, al clamà il Signôr: — Signorut, dàimi almancul Vô une man! Vêit pietât di un puar cioc, dal puar Barazzut che nol à mai fat mâl a 'ne moscje...! —

Cheste volte al ê rivât adore a distrigâsi e si e metût in strade.

Tal indoman, fat te stale, al va jù tanche 'ne fusete in glesie. Al jentre, si insegne, al fâs 'ne riverenze denant dal altâr grant e al fevele cjalant in sù: — Bon gjorno siôr Crist! — Po si volte de bande des stàtuis dai sanz: — A voaltris, santuzzaz, nuje! —

II muini ch'al è in sacristie, crodint ch'a sédin fruz a fâ dispiez, al cjôl sù la cjane des cjandelis, ma si ferme imbambinît viodint Agnul Barazzut ch'al jês a cessecûl de glesie, fasint di nò, di nò, di nò ai Sanz dai altârs, che no lu vevin judât a saltâ fûr dal fos-sâl la sere prin in Sotfrate.