Jo no sai se veramentri la ciocie de famee dai De Cecco 'e jé, propri a Braulìns, o linti atòr, come che si dîs; di chest cognòn jo 'o sai contâus cheste stòrie, che me à contade un de famee. E' lui le veve simtude di un veciòn so parìnt quant che si ere smaraveât di vê sintût a clamâ cul so cognòn un calabrês, no sai in ce caserme, quant che el ere a fâ el militâr.

Ah! tu no tu sâs la stòrie? 'i à dite el vecio. Tu savarâs che une gote di sanc dal nestri al è lajù da tanc' e tanc' ains; e simt mo cemût! Tal cis'cièl di Braulìns sot de crete de mont, piciât come un nît di aquile, par antìc al viveve un sioràt, un cis'cielàn prepotènt e tiràn che al faseve nome mal a' e pôre înt e dutis lis fantatis plui bielis lis voleve par sè, plar amôr o par fuarce... Le înt dal paîs e ché dai din-tornos 'e tremave nome a viodilu; ma une dì un trop di fantàs che no vevin aghe tes venis, si metin d'acordo sul mût di fâi le fuee e li-berâ cussì el paîs e le valade di cheil mostro. De lôr ti àn tirât àncie el servo dal cis'cielàn, che al ere stuf di ché vite.

Une sere 'e savevin che al doveve tornâ di Glemome e che se al voleve lâ a durmî tal so jet al dorveve passâ ta chel stret dulà che cumò al è el puint e alore si ciatave le bàrcie.

I amigos si mètin su la rive dal Tiliment in plene, che al businave jemplànt la valade di rumôr, par vie des ploes che erin coladis in chei dîs. El soreli al ere par passâ daùr de mont di Cuar, quant che chel brigànt al rive cul servo, e al dîs al barcarûl che lu puarti di là subìt.

— Áncie cheste zoventût 'e à di lâ a ciase usgnòt, — al dîs el barcarûl.

— Cussì 'o fasìn el viac' prime che al vegni scûr...

'E montin in bàrcie e vie planc su lis ondis turbidis, cu' le bàrcie che cricave pal pês. 'E passin el prin branc e tirade le bàrcie sul sa-valòn 'e passin ta chel altri branc che al ere plui grues.

Chel siorât al ere sèrio parvie che lui no si sporciave di fevelâ cun chéi pedoi; ché zoventût invessi 'e ere alegre...

Quant che forin tal miec' dal secònt branc di aghe, dit e fat, chei zovins ti saltin intòr dal cis'cielàn e cence spietâ 'i tirin el cuel, come a di une razze, e po pùnfete tal Tilimènt, che lu à glutît come un macaròn...

Apene di là, un di chei insieme al servo al cor in cis'cièl par dî a la siore che ju mandave el paròn a domandâi no sai ce tanc' bês, che 'i coventavin par vie di un afâr che al doveve fâ in premure...

Che poarìne 'i ur dà i bês, e lor jù di corse pe stradute de mont, e po vie tal Tilimènt dulà che erin spietâs dai lôr sòcios.... 'E molin la bàrcie e ti partiscin; e passin Osôf, Pinzàn, Spilimbèrc e jù fin tal mar...

Di là 'e son lâs fin in Calàbrie dulà che son restâs e dulà che son ancimò... Chesc' mo si clamavin propri De Cecco... di Braulìns...