Une volte, cui sà ce tainc' ains indaûr, a Buje al murì improvvisamentri un om, e le autoritât di in che' volte 'e fasè puartà el cadavar in te glésie di San Bortul tal simiteri, fintremai che fos vignude Ie comission a fài le utumie.

A uardià chel muart e son stâs metûs di gnot Gardelìn Cecòt, che al ere sturbit, Paltàn e Capòt, tre lanis, coragiôs, bevidôrs che Diu lu sa.

Sunade l'Ave Marie i tre amigos 'e impiin atôr de casse quatri torcis, e si preparin a passà le gnot in compagnie di chel muart, fevelànt fra di lôr dal plui e dal mancul. Daûr dal altâr ti vevin puartâs dai biei butàz di vin e le s'ciàtule dal tabàc le vevin plene.

— Bêf copari... e si passavin dal un al altri el bocàl clucànt a plene gose.

E ti fevelonavin fuart di dut e di duc' par jemplà chel silenzío cu la lôr vôs.

Nol ere tant di stà contèns in te ciase dai muars, cun t' un muart denànt dai vôi!...

Nome Gardelìn, sturbit come c'al ere, al taseve, e di quant in quant si impisulave e al diseve di sì cul ciâf.

— Copari, cio' une prese... e dopo che si vevin passâde le s'ciàtule, Capòt che al veve bevuzzât di pui, al disé al muart:.

— Ciol, ciol ance tu une prese.... su svèiti, ce ustu stà li distirât... E riduzzànt ti van daûr l'altâr a cioli un'altri butàz di vin.

Quanche, ce isal ce no isal, ti sintin a sgorneà tal barazzâr di fûr de glésie rèt dal coro.

Paltàn e Capòt si fermin scoltànt, quasi cence tirà flât. El sunsûr dopo un pôe al cessà, ma dut t'un momènt un sbuf di ajar al distude lis torcis, fasìnt tremà el cuviert de glésie.

Gardelìn che nol veve sintût nuje, al si ere di gnûf impisulît cul ciâf tal sen.

Chei doi, restâs a scûr in che' manîere, tremànt come dôs fueis di pôl, stres un tôr l'altri, cui cievei dres come sublis, e cui sudôrs frês che ur corevin jù pal cerneli e jù pe schene, a pôc a pôc, simpri cessànt, si erin inciantonâs dapît de glésie cui pîs frontâs par tiere e lis spàdulis tal mûr come se vessin volût butàle jù par s'ciampà fûr.

Intànt el sturbit che nol saveve nuje di nuje, si svee e tra lûs e scûr (le lune 'e jentrave atraviers dai veris colorâs, e ti illumináve dentri un pochìn come se fos stade une làmpide pojade sul mûr) al torne a impià lis torcis.

Chei altrís doi no i disin nuje, e par rimètisi de pore che vevin incimò si tachin tôr dai butàz come sanguetes.

Dopo un momènt a tî sintin a uicà el puartôn di fûr sui cancars. E tornavin a tremà, quanche ti viodin a entrà el plevàn Bonèt.

— Ludros che 'o sês, ce veso mai fat cà dentri?.... Stant sul balcòn de canòniche al veve vedût che là vie al sucedeve alc, e ti ere corût cence batonàsi le vieste.

Al preà in t' un ciantòn un biel pôc e po' al tornà a ciase disìnt a di chei amigos che stassin cujès....

In chel timp che el plevàn al preave tal simiteri, Meni di Cec fi di Cechin Monâs, nevôt di mestri Toni Tatajù di Strombòns, un bocòn di orcul cussì grant, al tornave di morosà di Ursinìns Pizzul. Rivât lì di Cost, par no là a ciapà le volte a San Stiefin, al vigní sù pe curte di San Bortul. Al ere lusôr di lune come di dì e a dî ches oris nissùn nol podeve stàlu a spetà, e i muars no saltin fûr malafenò.

Ma el galantòm si ere sbaliât, parcè che rivât sot de s'cialinade dal simiteri al ti viôt sul prin s'cialìn sentade une roseane cu la so cossute su le schene, in cialcis blancis e stafès.

Ciale po' culì.... al pensà e sù dret, ma prime di rivài donge e viódile in muse, che' fèmine, si jeve e lizere lizere e và indenànt qualchi pas e po' dut t'un lamp e sparìs. Un sbuf di ajar lu ferme e i puarte vie el ciapiel. Ma nol ere finît dut.

Sul mûr dal simiteri un om, cu la cape rosse da fraterne, al coreve atôr atôr, fasìnt dai sals e màrculis cence mai colà.

Alore sì che i vignì une sbígule; ma ce vévjal di fà ?....

Al sì met a cori.... Quanche al ere sù de strete des cisis di Lene e Naclùt, al viôt ancimò lassù insòmp, un omenòn che lu spietave, fasingi le reverenze, cun grainc' inchîns.

Malafesì che 'o soi in t' un biel bal usgnòt.... e i vignì el coragio de disperazion.... Miôr frontà un vîf che un muart...

Al vierc' tante di curciele che al veve te sachete, e jù incuintri di chel demoni che lu spietave insòmp.

In tes cisis foltis come dôs muraes, qualchi ucelùt indurmidît in tes fueuus di rôl, al cisicave, spaventât di chei pàs tal cûr de gnot cidine; sar Meni nol sintive altri che el so cûr che i faseve ticotaco come un marcièl.

Rivât donge a di chel om che lu spietave i dà un colp di curciele atraviers de vite tajanlu in dôi e po' vie a giambis puartaimi....

Tal domàn a binore Meni di Cec, dut stufulît e cui voi plens di sium, al tornà su le strade fate la gnot prin par viodi ce che al ere stât, za che nissùn diseve nuje di vé sintût a zemi, o di vé ciatât un muart su pe strete.

Al ciatà une grande ramace di noglâr e t'une cioce di cestenâr impirade le so curtiele che i veve sbrisade cul dà el colp a chel che lui al crodeve un so nemì....

Si consolà, e tal timp istès al si vergognà tant che nol à olsât a dî nuje nance a chei tre dal simiteri che vignivin sù cidìns cidìns, blancs come le nêf e che i contarin ce che vevin vidût e sintût in che' gnot....

— Mai pui a viodi muars jò.., al disè Capòt.

— Ma nance jò sù par cheste stràde, s'o crodès di là a ciapà le volte a Vendôi par là a ciase....

E al contà nome che' de roseane e che dai muart cu la cape de fraterne sù pal mûr, tasìnt, ben intindùt, che' de ramace di noglâr par no passà par gnogno.

Pieri Menis