Dôs di pre' Checo

Cui che al à cognossût pre Checo Badìn al sà ce filze di storiutis e di barzaletis che al veve tal so sac.

Finide une, al domandave: «E chê po!... La savêso?... ».

Nol taseve un moment e tra lis tantis a'ndi veve ancje di penzis; une volte scomenzât, al molave fûr dut a sec senze un fregul di malizie, sclet e sancîr, fossino pûr presintis personis di riuart.

Al jere lui il prin a ridi cun chê bocjone sdenteade.

Une volte lu àn ritratât a bocje viarte e po, dopo, sot de fotografie j àn scrit: «Bocje plui grande di chê di Cattaro. 100 dîs di indulgjenze a cui che la cjale e 300 a cui che la busse».

Al veve une fede cussì sincere, profonde, quasi di frut che al smaraveave duc'!

«Di là — al diseve — 'o uei domandâ al Signôr ch'al mi lassi fâ il «giullare»... contâ storiis.. ».

I ultins agn de sô vite al vignive qualchi setemane a Buie dulà che al veve bogn amîs e une cjase ospitâl; prime di partî par tornâ dongje al sô pizzul Santuari di Ribis, mi diseve: «Jemplimi la scjatule... fin ch'o ài tabac mi ricuardi di preâ par tè!... ».

Cumò che al è in Paradîs 'o conti dôs storiutis sintudis di

lui; di dutis dôs, lui al figure in prime persone; ma che sedin

veris jo no lu zuri.

* * *

No sai in ce paisut che une volte ai jere lât a finîle; là al veve cjatade une canonicute a mût so; nome che il tinel al jere scûr e umìt par vie di une morarade viere ch'e cresseve te braide di un paisan che nol jere tant mol cui predis.

Pre Checo lu clame e lu pree che j gjavi almancul dôs di ches plantis par vê un pocje di lûs e une bave di aiar.

Chel, lì par lì, j promèt, ma al passe l'istât, al passe l'unviâr e la vôre no ven fate.

Alore il predi al cjol une foradorie, al fas une buse tal zoc dai morârs e dentri al mèt un piz di sâl.

In pôs dîs la fuee si flapis, si secje, 'e cole; i morârs a' jerin muarz!

Ma cumò Pre Checo al veve pôre che, gjavant lis plantis secjs, il paron al vedès lis sôs busaris e lu denunzias.

Chest mo, che al veve non Toni, al veve slargjade la vôs che il Capelan j 'e veve petade. Alore Pre Checo j cjape la volte; al domande a tre o quatri di lôr s'a vevin sintude la «calunie» di Toni sul so cont.

Sigûr che la vevin sintude! Baste... Denunziâlu par difamazion... Cemût nò?... 'E và di miez la reputazion... Altri che denunziâlu!...

Dut il paîs al spietave il dibatiment: ma Pre Checo al cjape il judis e a quatri vôi j dîs che lui nol ûl scandui, che se Toni al oleve cumbinâle si podeve lâ d'acordo... ma in udienze... denant dal public... simpri par vie dal onôr!...

In sedude il Judis al domande a Pre Checo se proprit al oleve une sentenzie o se nol jere il câs di cumbinâle.

— Cumbinâle?!... Dopo di vêmi caluniât par dute la Provincje?... A ogni mût ce disial l'mputât?...

Toni blanc come un pezzot al domande scuse, al dîs che j domandi ce che al ûl, ma che no lu ruvini... se al veve dit alc, lu veve dit di bevût...

— Po bèn jo no soi trist... Fininle... — al dîs il predi.

— Ce domandial pal dams?... — j domande alore il magjstrât.

— Che al fasi lui... mi rimet 'e sô justizie...

— Alore Toni, sêso content di lassâ i morârs secs al Capelan, pe glesie?...

E chel biât omp cu lis lagrimis tai vôi:

— No dome chei secs siôr Judis: dute la morarade j doi... dute la morarade che al cjoli...

Cussì mo ve' pre Checo al à sanât il tinel e al à judade

la glesie.

* * *

Une volte pre Checo al veve une santificetur di massarie che guai a dîj un lafè; subìt 'e trimave, si sblancjave in muse e ti scjampave a platâsi in cusine come il gjat se si pescij la code.

Par lui biât predi che nol veve pêi su la lenghe al jere un torment.

Se al vigmive qualchidun a ciatâlu, al doveve molâ la spine quant che la Perpetue 'e veve servît il cafè, se nò a' jerin su-spîrs e musis come se al fos un muart in cjase.

Une fieste a buinore, prime di messe grande, pre Checo al preparave i conz par dîju in glesie: la massarie 'e viarz ben planchin la puarte par domandâj ce che veve di meti dongje di gustâ.

— Fasèit chel che 'o volês... j rispuint stizzât; ma chê, no si rassegne e dopo un moment j torne a domandâ la stesse robe, e lui, la stesse rispueste.

I conz no quadravin e ancjmò il muini al tirave il campanel. E ve' che pe tiarze volte la puarte si viarz e la massarie ancjmò a domandâ ce ch'e à di fâ di gustâ.

— Us al ài pûr dit!... cè che 'o volês... cagne da l'ostrighe!...

— Iessusmariesignôr... — 'e zèm la pôre femine metinsi lis mans sul cjâf.

A misdì no sai ce che al jere preparât, ma chê femine 'e veve une muse come un pòdin.

Dopo gjespui, come il solit auant che al jere a cjase sô, il vescul Cataròs, al vignì a fâ visîte al Santuari e dopo al si fermà a fâ quatrì cjacaris cun pre Checo, che lôr si cognossevin d'in chê volte ch'a jerin a Montenârs: un plevan dal paîs e chel altri Mestri di Scuele.

Dopo un pôc ch'a jerin tal tinel, pre Checo al jes fûr par lâ in scritori.

Lassâ il vescul, «Siôr Santul», dibessôl?

La massarie si presente cul cafè fumant; no veve nissun riguart jê di chel sant omp che tantis voltis la veve confuartade; cu la sô semplicitât nol dave nissune sudizion, anzit quant che al cialave cun chei vôi cussì bogn platâz sot dôs ceis penzis, e al fevelave cun chê pachee, al pareve di jessi striâz e subît si metevisi in zenoglon...

— Alore, cemût lino cà, Mie?... — al domande il vescul. E chê, come se no spietàs nuie di miôr:

— Ah, s'al saves, ecelenze...

— Contaimi, contaimi, Mie...

— Uè mi'nd'à ditis dôs in tune, saial... che mi son ladis al cûr...

— Spiegaimi Mie, ce che al è stât...

— O Signôr benedet, cemût tornâ a dî chês rôbis!?...