La vite di uè, cul so "moto", senze padin, plene di "novitâs" e di intops di ogni sorte, 'e finis di sepelî il mont ch'al jere stât dai nestris paris (Dî perdoni), cu la poesie dai costums e la ricjeze di usancis, metudis adun in tainc' secui.

Ogni ricorenze de vite 'e veve il so contorno di manifestazions, che la rindivin vive e plene di significât.

I matrimonis, in particular, 'e vevin une schirie di usancis che si stiravin vie, prime e dopo des gnocjs.

Une di chestis usancis 'e jere chê di "lâ a contentâ". Qualchi setemane prime des gnocis, i nuviz,cui lôr genitors, si cjatavin in tune ostarie, in tune stansie riservade, magari fûr di pais, par bevi insieme une tace di vín e mangjâ une fete di salàm.

Di solit no vevin problems di sorte di tratâ, ma chel di cjatasi insieme, 'e jere une prove "simboliche", par mostrâ di jessi contenz, di une bande e di che altre, che il matrimoni, "al puartave a misturà il sanc fra lis dôs fameis".

In chel incuintri, dispes, la nuvize 'e jere la prime volte che fevelave cun chei doi che saressin deventâz, il misser e la madone.

Cence la "cerimonie" di "lâ a contentâ" 'e jere une prove che in chel matrimoni al mancjave alc di impuartant...

II luc de cunvigne par "lâ a contentâ", il matrimoni di Carlin e Dorine, al jere stât sielt a Cuelalt, il paisut legri che si incuintre sul stradon che dal Cjanâl dal Fièr al mene a Udin, cu fa glesie blancje insomp dal cuc, in te vecje Ostarie di Gnervin, che ai nestris dîs e à lassât il puest al Albergo là di Moret.

Done Pine e sô cugnade Menie, la mari e la agne dal nuviz, 'e jerin rivadis in caretin, de bande di Buerijs, mentri la nuvize, cun sô pari e la mari, de bande di Raspan.

'E jere une zornade clare, cuiete, cun tun soreli sflandorôs ch'al navigave sul cîl cence un spèl di nul.

Dorine 'e veve intorsi une cotule color blù scur, cun balutis blancjs e une bluse di sede sierade fin sot le barbe e lis manies a camuf, ch'e finivin pui in jù des canolis; i cjevei lassaz môi sul cerneli si sieravin cun tun coco grant come une bale di stoc; sot de cjeveade 'e fasevin spico i rincjns, doi cerclis d'aur lusint, ch'e metevin dongje no sai ce a chê musute frescje di Madone ch'e veve...

Viodint pe prime volte Done Pine, sô madone deventant, Dorine, 'e deventà rosse fin tes lidris dai cjevei e fa ponte des ongulis e i soi voglons di buine 'e deventarin pizzui.

La osterie di Gnervin, a di ches oris di fieste, 'e jere quasi deserte; tal curtilon, cul poz in bande, une cubie di omps 'e zujavin di balis e àltris 'e stavin a cjalaiu, sentaz su la bancje, ta l'ombrene dal bressò.

Metût il cjaval te stale j nestris vjandans 'e son jentrâz tal tinelut riservât dulà che jere preparade la taule cu la merinde tradizionâl; sul mantil fresc di lave, profumât di lissie, 'e jerin preparâz i platz a rosis rossis e blù, un bocal dal miôr vin de cantine di siore Nene, la parone di cjase. Dopo un moment di complimenz, une frutate 'e puartà un ploton di salam e sotgol vergelât, ch'al faseve vigní l'aghegole cul so profum, e une terine di ludric e ûz durs.

Tant di une bande chê altre 'e jerin fameis che podevin spindi...

Dopo rote la glace e mandadis jù lis primis glotidis, i discors 'e comenzavin a filâ; 'e fevelarin di dut, dal timp che in chel ân al jere strambut cu lis plois, che la racolte de ùe 'e jere scjarse, ma che al sares stât bon il vin, cul soreli avostan, che la sierade 'e sares stade buine pe racolte di antiûl, ma no dal parcè che si jerin metuz insieme 'e fevelarin, ven a stai, dal matrimoni di Carlin e di Dorine...

'E jerin zà in pins par lâ vie, quant che il pari de nuvize al disè cun dute solenitat: "Parcechè 'o sin culí lu savin duc'... e a nô e cussì disînt al mostrave cul dêt la sô femine, Done Pine e agne Menie 'o disevi, 'o vin pôc ce fâ in cheste facende... e son lôr... i zovins ch'e àn di lâ dacordo... che àn di volesi ben par dute la vite... 'e son lôr, ch'e àn di plantâ une gnove famèe ch'e larà indenant ancje dopo di nô...".

E chel paston di omp, che si varès dite, a cjalâlu, di fâ pore al diaul, al veve la vôs che i lave jù pal cuel.

E cussí si son saludâz. Done Pine e agne Menie si son inviadis a pît de bande di Buerjis, dilà che si jerin rivadis, 'e Carlin, cul cjavâl, par Raspan, al puartá a cjase la morose e i soi genitors.