Vigj il cuintribândîr

Lu cognossevin par Vigj di Nimis il cuintribandîr, ch'al puartave il tabac fin a Buje. Al rivave di gnot, e si platave sul toglât de « cjase stuarte » a Ursinins Grant. Di chi a' vignivin altris di lôr ch'a puartavin la cjàrie jù par San Denêl, e di là da l'aghe. « Balis » di tabac di cuarde, « colis » di pachez buluzzâz in cjarte colôr modon, fàz a quadri come pistrelis, che si vendèviju a quindis centesins l'un e a 'n' vignive siet par un franc.

Al jere un bon Vigj, restât vèdul ancjmò zòvin cun tun frut, Gjovanin, un biondin lunc e sec, cun doi voglons colôr dal cîl. Nol veve ancjmò vinc' àins che so pari al à scomenzât a puartâlu cun se; bisugnave uadagnâsi il pagnut; e po il vecjo nol varès mico podût fâ simpri chel mistirat periculôs! Cun tune ràscje di fiât, a' volevin ancje buinis gjambis, e nome mico parvìe de cjàrie di puartâ su la gobe fûr pai trois ma, soredut, par tajâ la cuarde se si intopàvisi te finanze o tai carabinîrs.

J 'ndi veve tocjade une brute une volte a Vigj di Nimis. Di Raspan al jere passât te Barusite e passade la strade fra Trep e Zeanut, lì dal Volt, si jere incjaminât pai cjavezzâi de Mussarie par lâ ju te valade de Burete, quant che, ce îsal e ce no îsal, dut tun moment al viôt par jenfri une zocjade di cjestenârs a lusî alc, cul riflès de lune ch'e lave a mont. Finanze o carabinîrs?! Si met a cori cu la cjàrie salde su la schene, e vie come une saete; e, daûr di lui, doi di lôr in divise ch'a fasevin un fracàs dal diàul cu la feramente des armis ch'a vevin intorsi. Dàj tu ch'o j doi ancje jo, al rivà sul ôr dal Cormôr in plene. Propit in chel la lune si platà daûr di un bâr di nûl neri cussì cjariât di semeâ ch'al colàs ju dal cîl di un moment al altri. La tiare, lis plantis, il mont, dut si scurì; e tal cjdinôr si sintive ancjmò il fracàs de feraze dai gjandàrmis. Vigj, jenfri lis cisis, simpri dadôr da l'aghe, al côr jù fin tal cjasâl di Gaetan cu la cjàrie che si sa, salde 'tôr di sè. Se la vès piardude al sarès stât un disastro. Al è passat par Sale ch'a jerin ancjmò duc' a durmî, e cussì par Colosoman...

Puar Vigj! Sul toglât de « cjase stuarte » si è inacuart di vê piardûz i stafez, e i pîs cumò j bujavin come se ju vès vûz sul fûc. La cjamese si jere tacade su la schene come un carton e sot vie j brusave; lis brazzadòriis de cjàrie su lis spàdulis a' vevin lassât il segno di sanc imbrucjât. J je vignût un fieron di cjaval, di crodi chal vadi cun Diu. Lis feminis dai curtìi vizins j àn puartâz decoz di jarbis, plàdinis di aghe di màlvis par fâ impacs su lis plais. Dopo tre dîs al à podut tornâ a cjase.

Cumò, dopo di chel câs, al cambià strade, anzit trois, par vignî a Buje cul cuintribant. Di Nimis al rivave a Segnà, e po a Buèriis, e pai palûz sot Zeâ, par cjamps e cjavezzâi, al rivave tal so scuindurîli.

Gjovanin al jere deventât un fantazzon fuart e biel; dutis lis fantatis j tiravin i vôi. Ma un astât, dopo San Pieri, Vigj di Nimis al tornà cu la cjàrie dibessôl.

«E Gjovanin? » j domandavin; e lui, serio serio, al diseve che nol stave ben, che al sarès vignût un'altre volte.

Ma dàj une e dàj dôs e tre, finalmentri al à contât che so fì al jere tant malât, maladon.

« Ce àjal po che frutat?!».

Di Vigj no si gjavave grì di une buse, e alore Tarèsie, la parone de « cjase stuarte », une dì, cun sô fie Miute, si met in viaz par Nimis.

« Dulà îsal chel frutat? ».

Vigj nol voleve lassâlu viodi. Puar Gjovanin! Nancje di cognòssilu! Nome piel e uès di lui, e doi vôi scocolâz ch'a cirivin alc che nol jere. Al passave i dîs su di une grampe di fen daûr de puarte de cjamare e al zemeve. Tal jet nol podeve stâ, che j dulive pardut.

« Tarèsie, preàit il Signôr che mi cjoli. No puès plui », e al vaive cidin.

«Nò, Gjovanin. Il Signôr al è grant. Tu âs di uarî, di tornâ come prin, a lavorâ cun to pari ».

Difat une gnot, dopo no tant timp, Gjovanin al tornà cun so pari sul toglât de « cjase stuarte ». Al jere tornât miôr di prin, e si jere slungjât ancjmò.

♦

Al montanave a selis che Diu la mandave in chê dì a binore, e alore Tarèsie 'e clamà in cjase i cuintribandîrs. Il fogolâr al ardeve come une fornâs, e sui tre pîs in bande de flame, su lis boris, 'e rustive la polente de sere prin, jemplant la cjase di profum.

E cussì Vigj di Nimis, fra une bocjade e chê altre, al contà la storie di so fì striât.

Une zornade in plen misdì si presentà tal curtilut de sô stàipe su la strade di Torlan, un vecjo. Al semeave un puaret, ma nol cirive la caritât. Al veve une barbe lungje e blancje, e 'tôr di un baston al veve tacât un sacut che al puartave su lis spàdulis. Si sentà tal curtîl e, sujansi i sudôrs cu la mànie de camisole, al tacà a discori. Al vignive di lontan, e al jere strac.

«No vêso nissun in cjase cun vô? », al domandà a un ciart pont a Vigj. E Vigj alore j contà di chel frutat ch'al veve di sore, ch'al penave, plui di là che di ca.

«Si puèdial viòdilu? ». E senze spietâ rispueste si invià su pes scjalis.

«Puare creature! ». E lu cjarezzà sul cjâf planin planin cjalanlu fìs in muse, e dopo al tirà fûr dal pacut ch'al veve sul baston e al scomenzà a ònzilu cun tun onzint ch'al jemplà la cjamare di un bon profum. Lu à ont da cjâf a pîs, e finide chê operazion al disè a biât Vigj ch'al jere restât a cjalâ a bocje viarte: «E cumò 'o fasês come ch'o us dîs jo. Slargjait la cjamese dal frutat sul paviment ben a larc, e cun tune bachete di noglâr, atent, di une sole menade, batéit par-sore... batéit tant ch'o volês, ma no disore la fassete. Domenie, lant a Messe grande, 'o viodarês la strie. Atenz a no rispuindi se us salude! Jo 'o tornarai dopo a cjatâus... ».

Vigj al à fat come che il vecjo j veve dite; e la fieste dopo, pardabon, lui e so fì a' son lâz a Messe grande ìn plêf. Si jerin apene inviâz su pe rivute dopo passade l'aghe, che ti viòdin a vignî jù cuintri di lôr, ma sul ôr de strade, une femine, vistide di neri, cul fazolet di cjâf tirât fin su la ponte dal nâs.

Gjovanin le à subit cognossude, e come par magje si è visât di dut. L'an prin, passant denant de cjase di chê femine,

la veve viodude che, sentade tal curtîl, 'e mangjave cjariesis apene tiradis jù di une plante ch'e stave tal ort. «A'ndi è ancje par te, Gjovanin, se t'us lâ su a cjòlilis ».

Su la ponte de cjariesàrie 'e jere restade une pìncje cjariade, fisse di balutis rossis di fâ vignî l'aghegole....

Gjovanin si rimpinà sù pal len e al à fate une panzade di chês... D'in chê dì nol è stât plui lui. No si visave nancje plui, di chel fat. E al lave devant daûr come la corèe tal fûe...

Quant che il vecjo mistereôs al è tornât j disè a Vigj: «La vês fate gruesse galantomp. Ma 'e je lade ben istès. 'Us vevi pur dite di no bati la cjamese plui in su de fassete di cuel! Se domenie 'o vessis viodude chê femine... chê strie, 'o varessis viodude une muse dute vergulade di uiscjadis... ! ». E batint une man su lis spalis dal zovin il vecjo j à dite: « Simpri in gamba, fantat... ! ».