Il diaul

di Pietro Menis

Meni Vidot al jere un omp ni bon ni trist, ma j plaseve di bevi, e di bevût al blestemave senze ritegno e senze riuarz par fruz o par feminis; par nissun.

Mariute, la sô femine, no voleve sintîlu a blestemâ, ma no podeve fâ nuje par fâlu dismeti e inalore si sbrocave cussì: — Figurate che tu sês! Al ven ben il diàul a cjolti. Ti puartarà vie vîf! —

Meni al riduzzave, e s'al veve bevût 'ne tazze di plui j berlave: — Tâs tâs, strìe! Il diàul tu sês tù! —

Ma la femine no si rindeve e j ripeteve, come une gjaculatòrie: — Ti puartarà vie vîf, t'al dîs jo. —

Une sere d'unviâr, clare di lune come di dì, frede di cricâ, Meni Vidot si jere fermât plui dal sòlit ta l'ostarie de Parusse; il cjaldut de stue, un vinut apene spinât ch'al lave par ogni aìne, lis cjartis che lu vevin fat vinzi une partide daûr chê altre — dut al veve judât a fâ vignî miezegnot.

Meni al tirà dongje la manteline viere di alpin fin sot il nâs e s'invià par lâ a cjase. In chê gnot, nissun lave par chê strade.

— Ce sflandôr di lune. Al è un pecjât lâ a durmî! — j disè l'ustîr sierant la puarte daûr di lui.

No si sintive un chic te gnot citine, e tal lusôr de lune si vares podût viodi un omp une mìe lontan; lis cjasis senze lumins a' semeavin uèidis, senze vite.

II frêt al jentrave par dutis lis cumissuris, ma Meni Vidot in chê sere no lu sintive. Al veve il bultric plen tanche une damigjane e al cjaminave instes dret e lizêr.

A un dât moment, cuissà parcè, il nestri omp si voltà indaûr. Une robe nere 'e vignive indenant tal miez de strade. Meni si fermà e ancje chê robe nere si fermà là ch'e jere, cidine. Ce podèvial jéssi? Al prove a fâ qualchi pàs, e ancje chel voluz neri s'invià cun lui.

«Al ven ben il diàul a cjolti, figurate! ».

La sentènzie de femine j fulminà il zarviel; un sgrisulon par dute la vite lu fasè tremâ come 'ne bachete, po ancjmò al sintì un cjalt jù pe schene tanche se j vèssin butade daprûf une séle di aghe bulint, e i pîs, i pîs a' vevin lis alis...

Meni Vidot, squasit senze visâsi, si metè a cori a gjambis puartàimi, cui cjavei drez e la bave in bocje; e simpri chê robe nere daûrj: la sintive, la veve a pôs pàs ...

Come 'ne saete al jentre tal curtîl di cjase, e sù dret su pes scjalis, sustant: — Mariute, al è il diàul, al è il diàul! —

Al spalanche la puarte de cjàmare e dentri in tal jet, sot la coltre, viestût.

— Mariute, al è il diàul! Mariute ... —

La femine si svèe spaventade senze capî nuje, e no cjate il cric de lûs: — Meni ... Meni ... « A la parte di Diu», ce îsal?—

Quant che 'e rivà a impijâ la lûs, 'e saltà-jù dal jet, e ce viòdije alì, su la puarte de cjàmare restade viarte, spalancade ?

'E jere la cjavre di sô comari Lùzie dal Gri, une besteate che dispes 'e scjampave dal so cjôt par lâ a fâ quatri pàs; e in chê gnot cussì biele, j jerin vignûzsù i consolons.

La puare bestie, ferme su la puarte, 'e cjalave, smaraveade ancje jê dal davoi; e al pareve ch'e disès:

« Ce îsal stât? Ce âo fat di mâl, jo? ».