Martin Codet al jere vignût une dì in buteghe quacjo quacjo come se al vès vût alc di penz di dîmi. «Tu varessis di fâmi un plasê, tu che tu sâs componi plui di me... Mètimi ju dôs peràulis par mê fie che si spose... Jo 'o sai scrivi, ma no componi... ».

«Ma in chê dì no ti tocjarès a tì di fevelâ... » j dis jo. «In ogni mût, ce varèssistu di dîj?».

«Cussì, po: ch'e je stade simpri une buine frute... che mi displâs che si maridi... E augurâj ogni ben... ».

«Va ben;... 'O provarai a dâti dongje alc... ».

Un mês dopo lis gnozzis, Martin mi cjate e, cjapanmi par un braz, mi tire viars il Bar vizzin: «Anìn ch'o ti paj un cafè! Se tu savessis il sucès a lei lis tôs peràulis! Un grum di lôr a' vaìvin, e ancje il nuviz al jere ingropât... E un batimans che no finivin plui, e podopo, lu cròdistu?, duc' a domandâmi, duc' a volê savê cui ch'al veve preparât un discors cussì biel... ».