Dutis lis feminis dal borc a' tabacavin ce piui ce màncul, ma Mie Dòrdul a 'ndi tirave sù plui che il mus sèmule. Tra jê e so missêr a' svuedavin un veri daûr chel altri, come fâ tele. Si sintive a pestâ di tant in tant in ogni cjase, ma là dai Dòrdui chê musiche si sintìvile ogni setemane: tan-tan... tantan... tal mortâl di piere, cul strangulin di fiâr.

Taresòt 'e passave dispès a Zeà cu la sô cjàrie di tabac di troi, ven a stâj cul tabac di cuintribant, tune sporte di stranc, mieze stramade, cu lis màntiis di pezzot, deventadis lustris di cragne.

'E stave a Trep, tal borc di Cente, tune cjasonate nere di fum, dentri la murae insomp di un curtîl plen di urtìis e un vecjo fijâr ch'al mandave fûr i soi ramaz parsore il puartelut de jentrade.

Par pore de finanze o dai carabinîrs, Taresòt, 'e lave simpri atôr pes curtis. Par rivâ a Zeà 'e vignive sù pal broili dal miedi, e po par cjavezzâi e fìlis di morârs 'e rivave te Mussarie; e, di chì, là di Gjarus, su pe strade dal Pradulin, 'e rivave tal borc. 'E jentrave in dutis lis cjasis; scomenzant lì di Cjastenêt, 'e finive lì di Ane Carete.

«Comari, astu bisugne uê?». Si sentave su la prime cjadrèe ch'e cjatave, 'e pojave la sporte su la taule e 'e scomenzave a tirâ fûr, un, doi, tre... siet pachetuz par un franc. A' costavin quindis centesins l'un, ma al ingruès 'e tirave ju cinc centesins.

'O viôt ancjmò chei pachetuz quadrâz di cjarte colôr brèe scure, ch'a nasavin cussì fuart di lâ tal zurviel. E quant che mê mari o mê agne Sofie mi fasevin pestâ ancje me cul strangulin tal mortâl di piere il tabac di troi, chel tuf ch'al vignive su mi faseve tossi, straludâ, e i muscui dai braz mi dulivin di ingropâsi.

Lôr, invezzi, chês tabaconis, a' gjoldevin a temesâ, une, dôs, tre voltis chel pòlvar biont; e podopo a misturâlu cu la cinise e messedâlu, messedâlu cu la sedon di len.

Une confusion di no dî, in chê sere, ta l'àrie di Dòrdul. Duc' chei des cjasis vizzinis a' jerin vignûz a judâ a scussâ panolis: doi cjarons che i bûs a' vevin stentât a menâ dongje de bràide gnove, la dì prime. Si sintive fin in cusine a sgorneâ tai scus, a cjacarâ, a ridi, a contâ stòriis.

Mie, la parone di cjase, parvìe che, muarte la vecje dai Dòrdui, 'e jere la prime brût, lavade la massarìe, 'e veve metût a cuei su la flame dal fogolâr lis balotis ch'a varessin mangjadis dopo finide la vore duc' insieme, mandanlis ju cun tune tazze di vin gnûf.

No mancjave mai une tazze là di Dòrdul a chei ch'a davin une man.

Tra une grampe di stecs e un manel metût sul fûc, Mie si jere metude a misturâ il tabac di nâs: cun tun pugn di cinise e dôs gotis di ueli 'e vignive une prese plui che gustose. A 'ndi veve plen un cjadìn, e cu la sedon di len lu messedave atôr atôr come che si fâs cul zavajon, po lu saborave di sot sore, lu pressave, par tornâlu a savoltâ di gnûf.

Un profum sutîl di tabac si spandeve par dute la cjase e al jessive parfin tal curtîl.

Finide la operazion Mie ti veve jemplâz tre butilions e cumò, prime ch'e vignìs dute chê int a mangjâ lis balotis, si jere inviade a platâju te mede dal fen, dongje il poz, dapît dal bearz; lì al varès fate la bole e in câs di «viso aperto» de finanze nissun ju varès cjatâz.

Passant denant da l'àrie, tal slambri de lûs di petrolio ch'e vignive fûr dal puarton metût in cop, 'e smìcje dentri il voli. A' stavin finint la vore; difati la int no si viodèvile, platade tal grum dai scus; e di chê altre bande si alzave la musse zale des panolis, un zâl clâr, lusint, biel, come l'àur.

Mie 'e veve sburtâz dentri tal fen i tre vens, plui in su ch'e podeve, e cumò, cu la man plache, 'e cirive di uajâ la buse: quant che qualchidun la cjape par daûr strente strente e une man svelte j tapone la bocje...

Al è stât un lamp. Mie 'e rive a gjavâsi fûr une man e cun chê 'e sgrife là ch'e puès, ce ch'e cjate. J à parût che lis òngulis si fossin slungjadis, come chês dal gjat, e che par un moment a' fossin jentradis in alc di tènar...

Une rugnade rabiose e, subit dopo, talpadis che si slontanavin tal scûr ju pe bràide...

La domenie dopo, a misdì, dut il borc al saveve parceche Cristin di Deline nol jere stât a messe come ogni fieste cui amîs: un gjat j veve sgrifât, ben e no mâl, la muse: Cristin, un toc di zòvin ben tressât, il plui scagarin di duc', che però lis fantatis no lu volevin, parvìe che par dut si cisicave ch'al fos un poc di bon...

Quant che Mie Dòrdul 'e à savût il câs, 'e disè: «Un gjat? E no podaressie jéssi une gjate?!». E nissun saveve s'e diseve sul serio opûr s'e rideve parsore di chê disgrazie!

P. M.