Vie pes Gjarmàniis

A Pfaffenhofen (i fornasîrs a' disevin Fofenufin) ogni an, la prime domenie di lui 'e jere une grande fieste ch'e clamave int di dutis lis bandis, come la fieste di Sante Catarine a Udin; ma ce ch'al tirave soredut la int a' jerin lis corsis dai cjavai.

(Quant che m'impensi 'o viôt ancjmò la tribune plene di siôrs e di sioris vistidis a rôs, a blanc, a 'zâl ch'a serneavin un zardin, ch'a si platavin dal soreli sot di ombrenins cul camuf; e tal miez un trop di personagjos vistîz a neri cun cjapiel a cilindro lusint; e dulintôr de spaltade, dulà ch'a corevin i cjavai, sdrumis di int ch'e uzzave i coridôrs e lis bestiis sberlant e batint lis mans).

'E jere ancje usanze che a Fofenufin, in chê ocasion, si cjatassin tanc' furlans ch'a fasevin la stagjon di chês bandis. No mancjavin soredut i capuzzaz che si sgambiavin lis impressions de anade, si judavin, magari baratansi, s'al jere il câs, qualchi individuo che nol funzionave o ch'al veve vût ce fâ cu la Pulizie par vie di qualchi cjoche o di qualchi barufe cui mucs.

In chel an 'o soi lât ancje jo, fantazzut di 15 o 16 agn, a viodi lis corsis dai cjavai, la prime di lui. Dute

la mularìe si jerin incodâz daûr Toni Viulin, 'Zuan Visòt, Tite di Lete, Lendo de Rongjade e altris di lôr. Par rivâ dal nestri lavôr a Fofenufin si meteve tre oris a pît, ce par stradis plenis di polvar, ce par stradelis e cjevezzâi ch'a passavin partraviars cjamps di forment 'zâl come l'aur e cjamps di patatis in rose luncs di no finî e po' ancjmò prâz di fen alt e gras e boscs neris di pins. Cà e là si cjatave qualchi cjasâl quiet tal vert, sot dal soreli, cui balcons flurîz di canelons e colombs ch'a svueletavin tôr dai çuviarz a spiz. Ogni tant parsore di nô trops di zoris neris a' passavin tal cîl turchin sberlant « qual... qual... ».

La citât 'e jere nere di int. La plazze centrâl, quadrade, 'e jere plene di barachis e baracons. (Oh, ricuarz! Su cheste plazze, sot di un tendon, pe prime volte 'o ài viodût il cine, culì pe prime volte 'o soi montât sun tune coriere di linee!). Laju in fons, denant de birarie dal Muller, cognossude in dut il contorno, cjadreis e taulins plens di bevidôrs de famose bire nere ch'al faseve chel siôr. No si podeve lâ a Fofenufin cence bevint almancul une bozze!

In chê dì 'o vin mangjât ancje il «gulasch»; ce delizie, dopo tre mês che si mangjave nome polente e formadi e vadì, di fieste, dôs fueis di lidric par gambiâ!

Dopo des corsis al à volût un pôc di timp, tra tan-te int, prime di dâsi dongje duc'. Quan'che si sin metûz in viaz, il soreli al colave-jù cence sflandôr tai ramaz dal bosc, ch'al slungjave simpri plui in cà la sô ombrene grise e frede. Ta chel cidinôr i fornasîrs, scarpis in man e camisole sul braz, a' tornavin a cjase, omps denant e fruz daûr.

Cussì 'o ài savût che Bepo P. nol sarès plui tornât cun nô a Koppenbach; il capuzzat in chê dì lu veve gambiât cun tun di Petershausen.

'E jere sucedude il dì di San Pieri. Pai fornasîrs in chel dì 'e jere fieste dute la zornade. Si calcolave di jessi a mieze stagjon e il capuzzat al paiave la bire a duc'. A binore no si leve a drezâ, ne dopomisdì a cjapâ-sù.

Dopo gustât, un caratelon di bire al vignive spinât e lì duc' a cjapâ di bevi cence misure. Si beveve in ligrie e par chel moment no jere diferenze fra sorestanz e lavoradôrs, fra stampadôrs e fruz, fra maltarûi e chei dal fôr, fra omps e feminis. La bire ch'e coreve jù frescje pal gargat, al pareve ch'e smuelàs pinsîrs e sin-timenz che di solit a' jerin platâz e che un fornasîr al varès pensât cent voltis prime di mostrâ... Si fevelonave, duc' si veve alc ce dî... Si stave ben cussì dongje l'altris..

In chel an a Koppenbach la fieste di San Pieri, o di mieze stagjon, 'e jere stade preparade sot il tachil a pôs pas dal lodar. Sun tun pruc al jere stât preparât il puest pal caratel, cun tun baldachin di frascjs di pin come une arcje par puartâ in prucission un sant; altris frascjs a' jerin metudis su lis gricis lì atôr, su la musse dal

savalon, te cinise des bocjs viartis dal fôr. Chel spetacul al jere pront fin di binore e i todescs ch'a passavin te strade par lâ a messe, si fermavin smaraveâz a cjalâ, cu lis gjambis a larc plantadis tai stivâi, mostrant i bregons di corean cul tabelon e la dople file di bêz d'arint sul gjlè; si fermavin lis feminis ch'a parevin plui pizzulis di chel ch'a jerin sot dal cjapiel cjariât di rosis di pezzot, cui gremalons plens di ricams a colôrs ch'a semeavin quadris piturâz di fruz...

— Ce ànin uê i talians?... — si domandavin, e ti levin vie cjacaronant pe strade, dadôr dal bosc, in file come s'a fossin in prucission.

Tôr des tre il paron al dè di spine al caratel e la fieste 'e comenzà. Al jere 'za un pôc che si jerin dismolâz, quan' che si sintì une vôs, la solite vôs che par un lamp 'e faseve bati il cûr a duc', ch'e puartave a duc', o prest o tart, rosis lontanis.

— Poo-stiii-nooo!... — al sberlave par talian il puestin di Waidhofen, un omp curt e grues, che si vares podût cjapâlu par un sac di stope che j vessin metût parsore, par ridi, un cjavon rôs come il fûc, cun dôs moschetis di podê lazzâ daûr des orelis!

Ancje in chê dì al puartà pueste. Une letare par Bepo P. un cariolist suturno, ch'al fevelave pôc e nol dave confidenze a dinissun.

— Ce astu po, Bepo?... — al domandà il palîr, viodinlu a jevâ-sù, dopo di vê dade une scorsete 'e letare.

— Sacrament... mi è muart il frut!...

— Eh?... —

Duc' a' vevin sintût e par un moment si varès podût sintî a passâ une moscje. Ma al è stât un lamp, che Nando, il «bassarot», un stampadôr che no si cjatave un altri compagn in dute la Baviere, al sghignî:

— Par un frut... tu imbastirâs un altri cheste siarade!... —

Bepo al svoltà daûr des gricis, si pierdè vie pai caséi e in chê sere nissun lu à viodût plui.

Tal doman il prenar al contà ch'al jere tornât dongje dopo miegegnot, cjoc disfat e ch'al veve durmît come un zoc, distirât sul grum di stancol, dapît de scjale, cu la panze paraiar.

Apene ch'e sunà la campanele, sul cricâ dal dì, si sintì a cori sui breons la sô cariole, e prime ch'a rivassin i stampadôrs al jere 'za tornât tal zoc a cjariâ ancjmò.

'E jere passade une setemane di chest fat, une setemane rùsine tra Bepo e Nando; nancje un chic tra di lôr, come s'a fossin stâz un in Cjargne e un in Friûl; a' tiravin ognun la sô carete cjalansi di stos. Ma duc' saveve che lis peraulis di Nando a' brusavin tal stomi di Bepo.

E te sabide dopomisdì 'e sclopà la bombe.

Bepo al veve strucjade une cariole di malte su la plôte di fiêr, dulà che Nando al stampave. Lu vevial fat cence volê o savevial di fâ dispiet?

— Viôt ce che tu fasis, macaco!... —

Bepo di parsore il desc j saltà intôr come une jene e lì partiere, cence une peraule, si son slambrâz la cjamese, si son sgrifignâz e muardûz come cjans, fin che il palîr e i maltarûi ju àn distacâz...

Par chel nol tornave a cjase in chê sere cun nô Bepo P.