Vie pes Gjarmàniis

Si jerin cjatâz 'e sagre in zitât i fornasîrs talians e la squadre de servitût dal paron todesc; al 'ere tal dopomisdì e a di chê ore diviars a' jerin zurui, «lustig» a' disevin i mucs; e si metèrin d'acordo di tornâ a cjase insieme pe plui curte. Partint sul lâ a mont soreli, pes dîs a' podevin jéssi te cove.

A l'ore stabilide, nissun mancjave. E vie a piduline. Prime par une strade plene di pòlvar, dulà ch'a passavin un daûr l'altri, i cjârs dai «puars» tirâz da cjavalons neris, rôs e blancs, plens di int parsore ch'a bacanave tant di cuvierzi il sdrondenâ des ruedis sul stradon; po' ju par une valade cujete traviars di prâz bagnâz di rosade, po' ancjmò su la creste di une culine dulà che bisugnave stâ atenz di no lâ a inzopedâsi tes zòcjs dai pins tajâz di pôc. Ancje i fornasîrs e la compagnìe dai todescs, strade fasìnt, a' cjacaronavin ognun tal so lengaz, sclopant ogni tant in ridadonis. Lis massàriis, Mary, Anna, Resiy la Lise, di tant in tant a' uicavin come cjanis spaventadis.

Tal trop dai fornasîrs a' jerin ancje «mui» za stracs di cori atôr. Par chê fieste il capuzzat (si ére viars la mieze stagjon) al lassave libertât dut il dì.

Finide la creste de culine, si scugnive passâ il bosc di Kebespôk, une pinede fisse fisse, dulà che nancje di dì al jentrave il soreli, e il passaz al 'ere cussì stret che no si stave in trê a pâr. Qualchidun al à visât di stâ atenz par no piardisi... E vie, duc' dentri par che galarie scure come in bocje, plene di cidinôr. Si cjaminave sul muscli e lis spinis secjs dai pins come sun tun tapêt.

Cui sa parcè Tinut, un «mul» a la prime stagjon. si 'ere cjatât in code, subìt daûr dal so stampadôr, Romàn, un bassarûl ch'al 'ere a brazzet cu la Lise. A' cjaminavin cumò duc' cidins. Nome di tant in tant si sintive qualchidun a berlazzâ, come par sintîsi ancjmò insieme ta chel desert scûr di pins.

Tinut, ch'al veve une fantasie impiade, al tirave i vôi di cà e di là, che di bot j saltavin fûr. J pareve di viodi spirz, magos, strìis... A ogni cricâ di un stec pescjât, a ogni svolt fra i ramàz, a ogni bave di àjar ch'e ves businât tes pontis dai pins, il cûr j saltave in bocje e al tremave come une uìscje.

— Passe denant, macaco!... — j murmujà il stampadôr, cun tune blestemate par prionte.

Ma Tinut al sintì un bot tal stomi e tai pîs come dôs muelis di mulin che lu ingredeavin e nol rivà a passâ denant. In chel, denant, qualchidun, lontan, al urlà, e alore il puar «mul» al pensà di jéssi bessôl in chel mâr di lens neris.

— Reste indaûr, alore, marmote!... — al tornà a dîj Roman.

Tinut nol sintive reson; ormai la disperazion lu veve inclaudât daûr chei dôi ch'a cjaminavin a brazzet, simpri pui planc.

Quant che Diu al à volût, a' rivàrin fûr dal bosc te lûs làmie de lune ch'e lave a mont.

— Cheste tu me pàis! — j disè il stampadôr, cu la bave in bocje tal jèssi fûr de galarie nere, slungjant il pàs par intropâsi cu la companìe.

Ce vevial fat di mâl, puar Tinut? Tal indoman a misdì, lant a mangjâ, il «mul» al zueteave e il capuzzat j domandà ce ch'al veve.

— Mi dûl la schene... —

— Al à cjapade une «arcade»... — al disè sot vôs 'Sefin, il «mul» ch'al faseve copie cun lui «a butâ jù».

— Viodìn... — j disè il paron, e tun lamp j veve sbotonâz i bregòns e tirade-sù la cjamese. Là che finis la schene, te part fofe ch'e je sot, Tinut al veve une vèrgule nere, dôi dêz largje e sglonfe.

— Mangje e po' va tal lòdar e duâr fin domàn — j tornà a dî il capuzzàt.

Tinut si è butât-jù vistît te sô brande di stranc e si è indurmidît come un len, tant che no si è mot fin tal «auf» dal domàn. Quant ch'al jessè dal lòdar, il paron lu spietave di fûr par dîj di lâ «a butâ jù» tal secont desc, cun Lendo.