Gno nono

Quant che gno nono, póar omp, al leve vie par strade striscinànt lis sôs papucis parcè che 'i fasevin mal i cai, chè mularie porche 'i sberlave daùr:

Meni de plume

le polente che fume,

i bêz te sachete,

une fan maladete.

Duc' 'e disevin che al veve bêz, e no sai parcè: quant che al è muart 'i àn ciatât une monede d'aur di doi sècui prin e un patacòt di cine di chei di Marie Terésie, riciece che le ài jo ancimò e la ten come une re-lìquie.

'I disevin àncie «crumiro» par dì une peraule difìcil e chest par fâ viodi le so economie in dut.

Ma la so no ere avarìzie bensì une necessitât dai timps e sore dut, par lui, une robe naturâl, abituât come che al ere a mangiâ a ciase polente e lidrìc, e fur doi sentesims di pan e cinc di vin, par podê tirâ indenànt la barache de famee.

Pensait che al ere restât vedul anciemò zovin cun cinc frutìns che 'i stevin due' t'un zei di lavâ.

Par lor al veve lavorât in vite so come un remìt e tignût cont, tignût cont che di plui nol varès podût.

Al faseve el contadìn, lavorànt la tiere di so pari quistade cui sa in cetantis generazions; e d'unvier, quant che le tiere 'e polsave, al faseve àncie el ciaradôr, menànt modon e cops in duc' i dintornos cui soi ne-malóns che vevin certs cuars che parevin un par di buins par puartâ i selòs de stale.

Us contarai un fat che 'i à sucedût une volte fasìnt chest mistîr

A Zeà, in chei timps, erin diviers che fasevin naulis par ciapâsi un frane vie pa' l'unvier; nemai tes stalis and'ere, lavôrs di sorte pai ciamps no si'n'faseve e alore vie....

Tal dopomisdì là dal pravilegio 'e fasevin le ciàrie po 'e menavin el ciar sot el puarti di ciase e le matine, ancimò di scur, 'e partivin un daùr chel altri, cidìns cidìns.

A di chês oris i cristians 'e durmivin e pe strade deserte si sintive el pàs lent dai nemai, el rumor des ruedis su la grave e il ciulâ di qualchi serae onte mal.

A Trep i ciaradôrs si dividevin lant un par cà e un par là cu'le lor ciàrie....

Une volte gno nono al doveve ciapâ le strade di Vendoi, jù pe' rive de Cente, sichè al scugnive passâ denànt dal Simitieri de glésie vècie, là che polsave le so fèmine... Marie Marion.

No veve sunât l'Ave Marie ancimò nò, e vualtris 'o saves che, fintremai che no sune une ciampane a buinore lis ànimis dai muars 'e zirin te gnot.

El nono al veve un pôcie di pore, al è ver, ma al va indenànt istès.

Come che us ài dite al leve jù pe rive sichè dopo di vê scierât el ciar, par jessi plui sigùr di no viodi nuje ti veve metude le man su la schene dal nemàl de so bande. ('O savês — nomo sì? — che a meti le man su la schene di un bò o di un mùs no si viôt ne stries ne muars, parvie che chestis béstiis 'e son stadis compagnis dal Signôr te stale di Betlèm?).

Ma a un cert momènt le scierae no ten plui e i nemai 'e comencin a cori denànt dal ciar ciamât....

Ce vèvial di fâ, biat omp? Al capìs che te curve lì disòt al sarès de-ventât un disastro... Dutis lis risorsis par podê dâ polente a lis sôs crea-turis 'e saressin ladis in fum.

Nono si met in zenoglòn su la strade glazzade e lì, cu' la scòrie tra lis mans tignudis sù, al pree la so fèmine muarte che lu judi par amôr dai sol frùz...

No volês crodi?... Denànt dal ciar si à viodût, dit e fat, un sflandôr e lis béstiis fermasi lì come se, nò un, ma quatri zocs 'e vessin metûs tes ruedis....

Lu ài sintut àncie jo a contâ chest fat di vècio, e bisugnave viodi ce-mût che al deventave fevelànt de so pore fèmine....