In chel an a Montenars a' jerin vignudis tantis cjastinis di no savê ce fâ di lôr: nancje i plui vecjos dal paîs no ricuardavin une anade cussì bondant.

Dopo di vê vendût a bon presit su dutis lis plazzis lenti atôr, di vênint regaladis a cossis a parinc' e amîs e mangjât fin avonde, e' àn pensât di passi i mùs, duc' i mùs ch'a jerin tes stalis in chei timps. Miôr cussì che no butâlis ju tal Orvenc!...

Ma l'an dopo ce suzzèdial? I cjastenârs a' jerin senze cjastinis! Za a setembar i riz a' colavin ju dai lens zâi e flaps come borsis vueidis! Alore qualchidun al dîs che chel al jere un cjastic dal Signôr. No si à di dâ la grazie di Diu 'es bèstiis, ven a stâj lis cjastinis ai mùs!...

Miserie nere in chel unviâr, di scugnî cori atôr a cirî farine e patatis fin jù pe Basse.

Alore, apene vignude l'Aviarte, prime che i cjastenârs a' bùtin fûr la fuèe, i caporions dal paîs a' van dal plevan e j dìsin di fâ une funzion par riparâ il mâl fat e domandâ al Signôr une buine racolte di cjastinis in chel an. «Eco» j dìsin al plevan «une grande prucission fûr pal bosc, e benedî duc' i cjastenârs...».

Il predi nol podeve dî di nò.

Cussì une biele dì dute la int si cjatà in glesie a spietâ di mètisi in prucision, e lis cjampanis a' sunavin dopli.

Mai plui viodude une prucission cussì lungje a Montenars. I fruz denant e daûr dal Crist, e po i omps, il predi cui zagos ch'a puartavin segloz di aghe sante par benedî i cjastenârs, e, daûr, lis feminis: une sdrume di no finî...

Quant che il plevan al finì di cjantâ il «Miserere» e' àn comenzât lis letanìis de Madone.

«Kyrie eleison... Criste eleison...», il coro al jemplave il bosc e al lave sù come il sunsûr di un temporâl pa la mont di Quarnan...

«Sancta Maria, ora pro nobis...». Lis vôs claris des feminis a' rivavin fin in cîl.

Ma ce îsal? I omps, cu lis lôr vosonis ch'al pareve ch'a vignìssin fûr di une grote, invezzi di rispuindi «Sancta Dei Genitrix», a' disevin: «Mai più castagne agli asini, mi nò, mi nò, mi nò...».

A' dìsin che di chel an in ca, cjastinis a Montenars a 'nd' è simpri vignudis, ma i mùs no lis an mai viodudis...