La Int

In chê dî a buinore duc' i barcons, scurs di fûr e veris di dentri, 'e jerin viers, spalancâz, tant che l'aiar al jentrave cun dute libertât, svintulant tendis e festons come par un zuc mataran. Lis feminis ch'e levin a Messe-prime, la int ch'e lave te latarie, 'e cjalave smaraveade; qualchidun si visave di vê sintût vie pe gnot a cori automobii. Cui sa ce ch'al jere di gnûf lassù? Chê int 'e jere usade a viodi chel cjasament che si alzave su la piche dal cuc, parsore de boschete di pins e faiârs, teis e pôi, simpri sierât come une pereson. E di pereson 'e saveve pardabon, massime par vie di chê torate cui merlos rôs di modon e chê rie di cipres neris che corevin jù pe rive de bande daûr fin su la strade.

Pe stradele dal cjscjei, dulà ch'e cresseve une jerbe vidrizze ch'e cuvierzeve il gravin blanc, al vignive-jù il capelan cul breviari e la borsete dal ueli sant tune man.

— Siôr, jsal qualchi mâl?... —

'E stave mâl Ortensie, la massàrie: un strasit di femine che duc' in paîs la clamavin «la coriere » par vie che in timps aromai lontans, tai biei timps dai «parons», 'e jere simpri a tôr come il purzit di San-tantoni, a cjoli chê robe, a domandâ chê altre, sdravajant un pâr di scarpatis di omp d'unviêr e discolze d'astât, simpri malinsest, ma contente de bocjade ch'j davin. 'E jere pizzule, un pôc imberlade, cun tune gjambe ch'e butave a sclauèz, i voi pizzui fers e frêz. Nissun saveve ce etât ch'e veve al pareve ch'e fos simpri stade, come il tei de plazze; aromai apene i plui viei si ricuardavin che di pizzule 'e jere stade a cirî, che di 'zovine 'e veve vût un frut sore fìlâ e che lu veve scjafojât; dopo jessude di pereson, blancje come il lat, cu lis mans delicadis come une siore, si jere metude a lavorâ. Par mangjâ e cjapâ qualchi palanche ‘e faseve di dut come une sclave, uè tun lûc, doman tun altri, cence mai savê dulà che di sere 'e veve di pojâ i uès a polsâ. Dopo agn di chê vite si ere fermade in cjase Batae e, come un cjanut cence paron che infin al cjate cui che lu ten dongje, si ere afezionade a di chê int, ancje se la tratavin come ch'e podevin, metinle a durmî te lissiàrie e j misuravin il mangjâ.

—  Poare Ortensie!... — si sintive a dî par dut il paîs cumò. E duc' 'e varessin olût lâ-sù a viodile, a saludâle, a puartâj alc. Ma il puarton dal cjscjei si ere sierât cence remission daûr dal capelan, ciulant sui cancars rùsins.

Parcè si erial sierât cussì a la svelte il puarton daûr dal capelan?

E' jè une storie ch'e merte contade...

Di dut al jere stât colpe un vieri Crist di bande, inrusinît e plantât sun tun clapon squadrât a mazzûl, subit fûr dal paîs.

In chê volte, Polito dai Batai, che in paîs duc' a' savevin cetant ch'al pesave, dal dit al fat al jere deventât un «personagjo», un «gjerarche», come si diseve in chei timps; al rivave in paîs in munture, cun nastrins sul stomi, cun siarpis e stivai.

—  Chel, jotu, al sa fâle lâ!... •— Quant po che, pôc timp dopo, al comprâ

la culine cun dut il cjscjei dai Cjapons, la int 'e veve dut un ce dî:

—  E ce mangjadòrie!... Si sa, al è te grepie!... —

Ma in chê dî che par sierâ àtôr-atôr cun tun mûr la sô braide, al veve fat butâ-fûr il Crist ch'al jere sul cjanton, de bande daûr de culine, propit su la beorcje, la int si jere sintude tocjade sul vîf. I vecjos si ricuardavin che une volte lis fameis dal paîs a' levin in turno a piâj denant il ferâl e il dî des rogazions, propit denant di chel Crist si fermave la prucission e il Plevan al benedive di quatri bandis e al impirave te spacadure de crôs, sot dai pîs dal Signôr, une ramazze di ulîf benedît... Parcè butâjur vie chel Crist?!...

I borghesans alore, duc' dacordo, si son presentâz dal gjerarche: chel Crist al jere di dut il paîs, sîs secui indàûr, si podeve ancjmò viodi la date dal 1777 sot de scrite: «Pelegrin, salude il to Signôr!». «Il Signôr dai tre sies» lu clamavin.

Nuje ce fâ. La mape 'e diseve che chel Crist al jere sul teritori de proprietât dai Cjapons.

—   Lait a cjase cence fâ storiis, ch'al é miôr par ualtris... — e Polito dai Batai si jere ritirât cence spindi altris peraulis daûr di chei «ledanârs».

Tal doman Ortensie a tanc' ch'e cjatave 'e spesseave a dijur:

— No stàit a fâ stupidès. pal uestri ben...

— e si capive une mie di lontan che la veve imboconade il    aron.

Ma la quae no va simpri par une gâr!

Une biele dî 'e gambiâ sunade. Alore duc' i umign dal paîs, ce cun palis ce cun picons, altris cu la cjazze e cul marcjel, si son cjatâz in plazze sot dal tei e cussì in trop, 'e son lâz subit fûr dal paîs, sul cjanton de braide dal «quomdam-gjerarche» e si son metûz a lavorâ. Ti àn fat un slambri tal mûr e po dopo, drezzât di gnûf, tal puest di une volte, chel clapon squadrât a maz-zûl. Tal doman, che jere fieste, il vieri Crist piturât di fresc e la crôs gnove, cu la musiche in teste, niemancul!, a' tornarin tal lôr puest e la int intôr dute in fieste...

Ortensie, che jere restade dibessole tal cjscjei dopo il ribalton, 'e veve viodût la fieste stant in spie daûr di un scûr. Sot sere, che non si viodeve plui nissun, 'e vignì-jù zumpinant dadôr de rie dai ciprès e denant dal Crist, che dopo dut al jere ancje so, 'e impiâ cu lis lagrimis tal voi un cjandelot grues come un mani di picon. Tal doman, j veve spiât a chê dal pan:

—  S'al ven a savêlu «lui», m'impire come une 'savé!... —

Ma Polito Batae, se ancje al jere cent mìis lontan, nol veve ne la fuarce ne la voe di fâ il leon. Si è contentât di mandâ une letare a Ortensie par dîj di vê savût ce che vevin fat i «dalmenars» dal pais, che si vergognave di jessi nassût fra tante ignoranze. Par intant jê che stès cuiete, che no si impazzàs cun nissun; «siere il puarton e guai s'o sai che qualchidun al met pît in cjase mê!...». Ortensie 'e à fat lei a dut il paîs chel scrit e 'e veve nome ce fâ a dî:

— al è ben ch'o sepis... ma us prei, no stàit a fâmi mâl... — Ma il puarton no si riscjave a lassâlu viert!

* * *

Il «paron» al veve ordenât il funerâl di Ortensie pes cinc dopomisdì. Nol voleve disturbâ la int dal paîs cussì plene di lavôrs in chê stagjon; un funerâl sclet, mico par no spindi, che lui chel nol cjalave, tant al è vêr ch'al veve ordenade la carozze di prime e une casse di lusso che nissun dal paîs a' ndi veve viodude un'altre di compagne; lui, che disin ce che uelin lis lengatis, j veve simpri volût ben a Ortensie, e infati al veve volût che fos metude tal monument di famee, dongje sô mari.

—   Mâl fate... mâl fate, mètilis dongje l'altri... — 'e diseve la int riduzzànt sot côz — la parone 'e cjatarà sigûr ancje lajù alc par maltratâ chê puare biade e j disarà, si visàiso?: Va vie... va vie, cui tiêi ledanârs!... •—

Quant che il Plevan e il muini a' son passâz pal borc par lâ a jevâ la muarte no àn incuintrât un cjan. Al pareve ch'a fossin duc' a durmî o a vore vie pai cjamps.

Invessi... apene che il ferâl al passà il puarton dal cjscjei si son metûz daûr un trop di canàis e po daûr de carozze feminis, zovinis, omps e vecjos ch'e saltavin fûr dai puartons, des andronis e dai cjantons des cjasis; s'ingrumavin come par incantesim daûr di Ortensie ch'e lave vie par simpri in carozze di prime. Quant che il «corteo» al rivà fûr dal paîs la int 'e jere fisse a plene strade, tant che i otomobii dai «siors» a' jan scugnût restâ indaûr une mie.

—  Nancje vinars sant, no jè tante int in prucission... — al diseve il muini tune orele al Plevan fra un salmo e chel altri.

Tornant indaûr dal Simiteri, la int 'e fevelonave, 'e veve un ce dî che nol finive pui.