La lejende plui biele

Ti tòcjal mai a ti, letór, di provâ une voe mostre di vaí, di jessi lontàn di duc', bessôl, cui toi pinsîrs, magari in t'un lûc che al ricuardi alc de to vite?

Di ches oris a mi càpitin, e alore ogni volte che 'o pues fàlu 'o s'ciampi a Zeà, tal paisùt che 'o soi nassût.

La «nestre» ciasute di une volte, 'e jè pôre, basse, bessole, fûr di trop, nere, bandonade, cui mûrs spacâs, chel al pâr che un sbuf di ajar, le buti jù lamp par lamp.

Pôre ciasute dai miei ricuars, tu someis une zìngare denànt el cis'ciel...

Ma jo ti ami listès plui che un dômo, parcè che alì 'o soi nassût, e nissùn plui di te, mi ricuarde la me sante e buine mame, che cumò 'e duâr cujete sot di une crôs di piere a San Bortul: anzi, ogni volte che 'o torni, dopo tainc' ains, mi pâr di ciatàle, di sintìle, di podé fevelà cun je: culì 'o torni a jessi frut, bon, cence pinsîrs, cujèt, cun t'une pâs grande che mi jemple el cûr e l'ànime, e no mi pâr di jessi plui chel: culì 'o vîf le lejende plui biele, le lejende di me mari.

Dut culì 'o ricuardi, dut mi torne a passà denànt dai vôi: ben e mâl, làgrimis (oe tantis!) e contentezzis...

Quanche a binore, la mame mi jevave, mi menave denànt dal balconùt e mi diseve: «Viôt ce biel che al è el soreli quanche al nàs, ma prime che al vadi a mont, cui sa ce che al po' tociànus: prèe che 'l Signôr nus assisti, e nus uardi di mâl... prèe par to pari, tôr pal mont a lavorà... ».

E la sere, lant a durmí, mi diseve: «Ancie uè al è vignût gnot, graziant Idiu » e mi insegnave:

Signorìn, mi pon a chì,

jo no sai se 'o rivi al dì,

o rivâ o no rivâ,

che el Signorìn e la Madone

mi sedin a compagnâ.

'O ài quatri gràzies

al Signôr di domandâ:

Ueli sant„ confession, comunion,

remission dai miei peciâs... ».

— Mame, no sta distudà el ferâl, che 'o ài pôre.

— Prèe e tâs; i fruz boins no àn mai pôre, — e ti continuave: « Signôr, dait la pâs ai vîs, e la rèquie ai puôrs muars... ».

— Ce fàsjal papà pal mont, mame?

— Il papà, bambin miò, a'l è pal mont par guadagnà di vivi par dute la famèe: tu tu às di pensà dome di sedi bon e di cressi, che dopo tu larâs tu pal mont, e to pari al starà a ciase...

Alore, a scûr, 'o vedevi gno pari parsore une armadure, strac, cu la ciazze e 'l martiel in man, che al spietave, sujànsi i sudôfs...

Su le tôr dal cis'ciel di Zeà e' batevin les oris, planchìn planchìn, come se un agnul al vès batût cun t'une ale.

— Mame...