Chestis mès à contadis une femine di Avosäc, e no sai se sòn gnovis.

....In Mons, parsore Arte, une volte e'rin des pocis, come pizui láz, plenis di une aghe clare e verde come i pins. Dentri lis aganis de But e levin a lavà la lor blanciarie; grum di càpos di ogni qualitat che dopo e metevin a suiá par dut linti atôr. A cui che al pasave di lì, lu ciolevin vie, sfidanlu : « se tu ses bon di menà vie cheste robe, e iè tò; ma no son ciars, no sòn bòs che le menin».

E ti ridevin, e saltavin, viodìnt che biade int che cialave imbacuchide dute che blanciarie di podè mandà a marit dutis lis fantatis dal pais.

Ma un òm cidin, cidin al va di un mago che al viveve in t'une grote sot de Mont di San Pieri, e lu pree di insegnai el mùt di puartà iù de mont le blanciarie des aganis.

El mago ià insegnat : «tu ciariis le robe, e tu spetis che lis aganis ti disin " partisc " ma tu tu staras fèr invesi. Tu metaras la man gestre su le schene dal bò, e quant che lor ti ripetaran "partisc" pe tieroe volte, alore tu disaras:

— Mace di noglâr Racli di corgnâl Bachete di pougne In nòn di Diu, là si scùgne —».

Cussì al à fat chel om puartànt iù un grumon di robe. A vè vidut lis aganis a vaì, a sberlà e giavasi i cevei pe disperazion di no vô nuie plui.

E son sciampadis di lasù ; lis pocis si son suiadis e dulà che al è pasat el ciàr de lor robe, si viot ancimò la strade par dute le mont.