A Zeà, pìzzul paradîs de mê curte zoventût, cheste storie la contavin in file ancjmò ai prins di chest sècul.

I gnûs parons dal Borgut feudâl e' àn dadis lis clâs dal cjscjel a gno nono, il pari di mê mari, par ch'al làs di tant in tant a dâ àjar 'es stànziis e ogni dì a tirâ sù l'orloi de toresse.

Al jere stât il plevan a dîlu ai siôrs che il nono al podeve miôr di duc' fâ chel servizi; lui lu cognosseve di cetanc' àins, e al veve stime e fiduzie di lui: dibant, quant ch'al lave a Udin in Cùrie o ce sâo jo, no si faseve puartâ dal nono, Pieri dai Pontis!

Fin dai prins dîs dal servizi in cjscjel, il nono si jere intopât in tune magne: une besteate lungje, grise come l'azzâr, ch'e sparive, cuissà dulà, apene che lu viodeve. La prime volte la veve incuintrade in zardin, e fin chì nuje di strani; un'altre volte su lis scjalis de torate rosse ch'e veve la puarte rote, un'altre volte ancjmò te cantine, ch'e veve un balcon senze une lastre.

Ma quant che la cjatà tal salon di miez al prin

plan, si inturbidì. Une magne, cemût jèrie rivade lassù? Al è stât in chê volte che il nono, lant a viarzi il cjscjel, al puartave cun sê un raganel, un racli di corgnâl, dûr come il fiâr. Mancje mai...

Difati une dì, jentrant te cjamare dai foresc', al viôt la magne incolazzade sul jet. Il nono al alze il so baston par petâj ju, ma chê si drezze tant lungje ch'e jere e, sivilant ch'e lave tes zurvielis, j faseve cuintri cun tante lenghe di fûr, sutile e rizzote. Pôc ce fâ. Il biât omp al tajà la cuarde tiransi la puarte daûr cun tun bot che si slargià par duc' i curidôrs come une canonade.

Pôs dîs dopo, lant a Udin, il nono al contà il câs al plevan, e chel j disè di no vê pore, che chê magne no j varès mai fat mâl; po j insegnà il mût di parâle fûr par simpri. Ma dut si scugnive fâlu in segret, senze dî nuje a dinissun, par nissun cont.

«Si sîno capîz, Pieri? ».

«Sì, siôr copari».

Il nono al veve di lâ in cjscjel cun tune bozzete di aghe sante te sachete e, jentrant, al veve di lassâ dut viart daûr di sè: puarton, puartis, verandis; e nol veve mai di voltâsi indaûr.

Al passà qualchi timp senze viodi nuje. Ma une dì il besteon al jere intorteât daprûf il cjavedâl in cusine e al pareve indurmidît. Alore il nono al tire fûr svelt l'aghe sante, e fasint un segno di crôs al

dîs fuart: « Se tu, magne, tu sês une anime dal purgatori, va fûr di ca, che si fasarà preâ par te! ».

La magne, in màncul che si dîs, 'e cole jù dal cjavedâl e, cjapade la code in bocje, 'e à formât un cercli che si è metût a cori dibessôl, jessìnt pe puarte. Il nono al côr a viodi là ch'e lave, e la viôt che, passât il puarton, e va partraviars la plazze jenfri i frutins ch'a zujavin denant de gleseute, cun tune buride che nissun si è inacuart di jê.

A' contavin, dopo, che Tite Signôr, ch'al seave la jerbe cressude su lis sepulturis dal simiteri, al veve viodût a rivâ chel cercli fin dongje la crôs tal miez, e lì a scomparî par simpri sot tiare.

Forsi par chest su la puarte jentrant tal simiteri di Trep Grant si à viodût par tanc' agn une magne di fiâr fate a cercli, cu la code in bocje.