Mi ricuardi benòn, come se al fòs îr di ché frede matine d'invier.

Al iere dùt un fevelà, un cisicà tal pizzul borgut quiet su le coline.

Agnulàt al veve butât el Crist te pozze. Chel Crist sul ôr de strade su le crosere.

— Viòdistu — mi dîs me none, pore e buine viele, che mi voleve un ben di vite — viòdistu ce che si fâs a no ubidì i genitôrs? Agnulàt and à fatis di duc' i colôrs: pore so mari e iè muarte di crepecûr: quan' che une mari 'e rive a maludì le so creature, segno che and à avonde tal stomi...

— «Maladete l'ore che ti ài par-turît » i à dite — 'e zonte Catìn ien-trànt stufulide.

Cun me none i soi lât ance iò a viodi chel sacrilègio.

Al ere un frêt c'al faseve cricà: iò i tremavi dut tai misars vistîs imble-câs, ma i tignivi dûr, e i corevi zu-culànt su le strade blance e glazzade.

Mi à simpri plasût di viodi dut, di sintì dut ce che al fòs di straordinari. Dopo magari i vevi pôre e quan' che i levi a durmì i vaivi a stà bessôl, e la me sante mamute, che cumò 'e iè in cîl, 'e doveve stami donge el iet fin che mi fòs indurmidît.

Atôr de pozzate al iere un trop di int che al spietave il plevàn. O ài an-cimò denànt dai voi che scene.

Sòt de glazze slisse e clare si vedeve tal pantàn el Signôr, c'al pareve metût t'un' arce di veri.

Atôr, atôr i venciârs, vècios, plens di mus'cli e' semeavin torcis disdu-dadis.

Iò 'o cialavi e tasevi cidìn pe' man di none.

— Viòdistu Pieri — mi dîs. No sai parcè, mi sòi metût a vaì, e iè a-lore mi à menât a ciase.

Dopo di 'n chè dì, i ài volût tant ben a mamute, e nome cumò che no iè vizìn di me, i sai ce tant vueit che à lassât te me vite...

Agnulàt nol à vude ore di ben: al à mangiade la ciase e la so tiere a sun di ciochis: al blestemave come un lari: e dopo ains di chest infier, al è muart pedoglôs, tisic, bessôl.

Buie, 27 di fevrâr dal 1927.