Novitâz in pais

Nol ere nuje di gnûf in chel benedet paîs. Simpri chê mignestre ogni dì, dut l'an; simpri chês musis, fieste e disdevore. Vie pe setemane lavorâ, ce par cjase e ce pai cjamps, e juste, salacôr, la domenie dopomisdì, lâ a cjoli il gjelato là de Verine e la sere al cine cu lis amìis; e po tornâ a cjase. Ogni biel bal al stufe!

Ma une dì, in plen istát, 'e sclopà la bombe e la gnove si sparnizzà tun lamp di cjase in cjase, di un borc a di chel altri, fin tal ultin cjasâl: la setemane dopo un regjment di Dragons al sares vignût a fâ il «campo» in paîs. Pensait: un regjment di Dragons!

Come butâ un clap tun gjespâr! Dutis lis fantatis, zovinis e anzianis, bielis e brutis, dretis e stuartis, puaris e sioris, a scomènzin a piardi il cjâf, a fevelâ, a cisicá, a fâ progjez e siums.

Soldâz si 'ndi viodeve simpri. Dutis lis frutis a' vevin vût un fradi, un cusin, un vizinant, il morôs tai alpins, tal Gjenio o in Fantarìe; ma Dragons, mai viodûz. Cui sa ce fantazzons, ce biei zovins, massime i ufiziâi, duc' nòbii, marchês, barons, conz!

Dopo une setemane che i Dragons a' jerin rivâz, al jere dut un petez tes buteghis, te strade, pardut là ch'a si cjatavin

dôs frutatis insieme; e ogni dì a' jerin nuvitâz ch'a corevin di bocje in bocje come un sclopetâ di fusetis.

La Rieda 'e fevelave cun tun sargjente... ma al pareve ch'al fos sposât; Ane-Carle si jere inemorade di un tenente, che invezzi j coreve daûr 'e Fernande; l'Anita e la Manuela a' vevin lassât il morôs dal paîs par jéssi libaris di sielzint un altri; la Marisa, sposade l'invier prin, 'e veve gjavade la vere e si cjatave cun tun maressial; la Gjermana no podeve tignîsi te piel dopo che l'atendent dal colonel ogni sere al lave par cjase; 'e Sandra j veve sbrissât di dî ch'al valeve plui un dragon che no une squadre di alpins; la Iside lis veve cjapadis di so pari in che sere che la veve cjatade tal vignâl a lusôr di lune cun tun cjapitani; la Marceline... chê sì ch'e faseve afârs, che ogni sere 'e gambiave!

Quant, po, ch'e saltà-fûr la vôs che i ufiziâi a' varessin tignude une fieste di bal, tal miez di chel femenam in sfrèe al passà come un sgrìsul di contentezze, po di dùbit e infin di speranze.

Cui varessino invidât? Dutis, o nome chês bielis? chês sioris? chês plui elegantis? Lis sèriis o chês cence scrùpui?

In segret ognidune 'e tignive tal cûr la speranze di jéssi invidade. E cence fâ finte di nuje, ognune si praparave pe grande serade. Ce maravèe! Bisugnave meti-dongje il vistît adat, fâsi fâ la permanent, mètisi intôr un fîl d'aur, tirâ lis cèis a sèsule. E une, cidine, par ca, e chê altre cun tune scuse par là, une judade de mari e chê altre di scuindon, a' jerin ladis là de sartore: — 'O vares - a' disevin — un alc di premure. Dopo mai ch'o spietavi di fâ chest vistît! —

Lis zornadis cjaldis a' passavin cence visâsi in chel zornâ di petez, in chê fieste di zoventût. No jere rivade insomp dal paîs une gnove, che za un'altre j coreve daûr, la urtave, j passave denant.

Ma ce colp, puaris frutis, quant che il tenente Mariani, propit lì de Verine, al disè che dut il program dal bal al jere lât a mont «per ragioni militari»!

Ce fâ? Ognune 'e glutì in segret la sô pìrule. Po une cu l'altre a' tacàrin a dî che no si jerin mai lusingadis; che no j vevin mai pensât sore. Ma drenti-vie ce marum!

La fieste dopo, a Messe grande, mai viodude tante eleganze in paîs, tant lusso, tanc' vistîz gnûs tune volte: vistîz a sac, come cjamesis di gnot; a balon, tanche scartos di bagigjs; vistîz a «trapezio», e vie ancjmò cun nons stramps! Une sagre di mode.

Nome la Marine 'e lè a Messe vistide a la buine cun tun vistidut di massàrie.

— Ce sfazzade, cjalàile. A cui cròdie di dâle d'intindi?— a cisicavin chês altris, in grìngule.