Rivant su la place di San Scjefin al pâr di capitâ sun tun grant palcsenic, cu lis cjasis par senaris e la pianure par platèe.

Di gnot pò chê imagjne 'e torme plui fuarte quant che dut al è cujet e nome lis dôs lampadinis de lûs publiche a' fasin lusôr.

A pâr alore che sul grant palc pôc prin, 'e sedi stade recitade une grande tragjedie antighe, e, lade-vie la int, i atôrs a' sèdin fermâz ca e là daûr i senaris che ancjemò a' lusin fûr par qualchi balcon. Jù in te platèe scure e cidine al reste, fra cîl e tiare, un vêl lizêr di fum...

In cheste place une volte, come cumo, 'e jere la glesie e il municipi
e in tal miez la "vicìnie", dulà che si discuteve lis questions dal paîs e si fasevin lis lez; dulâ che si judicave e si condanave.

A' còntin che tal miez de place al fos un puest plui alt pai caporions
e une colone su la berline e lis cjadenis, parsôre un zocul, cun pieris scritis e ben sculpidis.

Ancje la statue de Justìzie, che cumò 'e je a Udin in place Vittorio, ch'e ven clamade "Marie Luigje" 'e jere a Buje in tal lûc clamât "Locum Iustitiae".

Invezi sot de loze dal vecjo municipi a' jerin bielis pituris di cinccent ains indaûr. Mi disin ch'e jere piturade la storie di Paride e dal miluz d'àur e devant, in bas, lis tre Parchis.

Po ancje un bo, la steme di Buje, e parsôre scrit: "Buja! Buja!"», come un invît di uere, come un "moto".

Quant ch'e àn fat il municipi gnûf, dutis chestis robis a' son scomparidis. "A' son resc' di barbàriis chês", j àn dit al
plevan che al veve tentât di conservà chês antigàis, e cussi dut al è lât piardût o distrut.

Par chest a Buje nol è un clap che nus feveli dal passât.

Ma jo us contarai lis lejendis dal gno paîs ch'a no àn bisugne di documenz scriz o scolpîz, ma ch'a si tramandin simpri frescjs di pari in fî.

Duncje a' contin che, su la place di S. Scjefin ai 22 di dicembar dal
1372, une certe Petrussa 'e je stade condanade a jèssi brusade vive in cjase sô.

La "vicìnie", dopo lungje discussion e viodût che cheste mari infame 'e jere rèe confesse, 'e à decretât la sentenze teribil par che un fat compain nol sucedès mai plui.

La sentenze 'e je stade eseguide subìt, in presince dal popul.

Po nus contin i vecjos che in duc' i timps i blestemadôrs e i scandalôs a' jerin condanâz de "vicìnie" a jèssi leàz 'e berline, su la place, par une o plui fiestis, par che il popul, lant 'es funzions in glesie, al podès vergognaju.